«ИСТИҚБОЛИ САРБОЗИ ВАТАН ШАРАФ АСТ». Кумитаи кор бо ҷавонон ва варзиш сарбозони аз қисмҳои ҳарбӣ баргаштаро пешвоз мегирад

Май 6, 2024 18:36

ДУШАНБЕ, 06.05.2024. /АМИТ «Ховар»/. Кумитаи кор бо ҷавонон ва варзиши назди Ҳукумати Ҷумҳурии Тоҷикистон баҳри қадршиносӣ ва эҳтиром гузоштан ба ҷавонмардоне, ки барои ҳимояи Ватан шарафмандона хизмати ҳарбиро иҷро намудаанд, ташаббуси ҷумҳуриявии «Истиқболи сарбози Ватан шараф аст»-ро амалӣ намуд. Дар ин хусус ба АМИТ «Ховар» дар Кумитаи кор бо ҷавонон ва варзиш хабар доданд.

Гуфта мешавад, ки дар ин ташаббус тамоми мақомоти давлативу ҷамъиятӣ, сохтор ва зерсохторҳои Кумита иштирок намуда, барои баланд бардоштани нуфузи Артиши миллӣ, ҷалби ҷавонон ба хизмати ҳарбӣ ва эҳтирому арҷгузорӣ ба ҷавонмардоне, ки дар сафи Қувваҳои Мусаллаҳи мамлакат хизмат намудаанд, ҳамовоз мешаванд.

Аз ҷумла, дар фазои тантанавии истиқболи сарбозони далери Ватан дар манзили истиқоматашон ба шодиву комронии волидони онҳо намояндагони вазорату идораҳо шарик шуда, барои садоқатмандона ҷамъбаст намудани хизмати аскарӣ ва тарбияи чунин ҷавонмардони ватандӯст ба волидони онҳо изҳори сипосу миннатдорӣ намуда, ба сарбозон туҳфаву сипосномаи Кумита эҳдо мегардад.

Бояд гуфт, ки ҳимояи марзу буми Ватан ва обод гардонидани он вазифаи имониву виҷдонии ҳар шаҳрванди мамлакат, бахусус ҷавонони бонангу номуси миллати тоҷик ба ҳисоб меравад. Он ҳамчун омили муҳими тарбияи ватандӯстӣ ва рукни асосии ҷавонмардӣ аз насл ба насл ба мерос мондааст.

Хуб мешуд, ки дар доираи чунин тадбир сарбозон ҳамзамон бо хонандагони муассисаҳои таҳсилоти миёнаи умумӣ ва бо донишҷӯёни муассисаҳои олии мамлакат вохӯрӣ намуда, вобаста ба  шароити фароҳамшуда дар қисмҳои ҳарбӣ бо ҷавонон суҳбат менамуданд. Зеро бо ин роҳ метавон ҳисси хештаншиносиро дар дили наврасон бедор ва онҳоро ба дӯст доштани Ватан, ҳимояи марзу бум дилгарм намуд. Онҳо бояд дарк намоянд, ки хизмат дар сафи Қувваҳои Мусаллаҳи мамлакат қарзи ҷавонмардӣ буда, ҳангоми иҷрои ин қарзи шаҳрвандӣ ҳар нафар метавонад худро соҳибватан дониста, арзишҳои миллиро ҳифз намояд. Воқеан хизмат ба Ватан қарзи ҳар шаҳрванд буда, далериву ҷасурӣ ва ҷавонмардии ҳар нафари бо нангу номусро талаб мекунад.

Барои насли ҷавон яке аз муҳимтарин мактаби обутоб- хизмат дар сафи Қувваҳои Мусаллаҳи мамлакат аст. Маҳз дар ҳамин ҷо ҷавонписарон шуҷоату мардонагӣ омӯхта, муқаддастарин арзиши ҳаёт- дӯст доштан ва содиқона муҳофизат кардани хоки поки Ватани азизро ёд мегиранд.

Дар ин радиф Сарфармондеҳи Олии Қувваҳои Мусаллаҳи мамлакат муҳтарам Эмомалӣ Раҳмон таъкид намудаанд, ки «хизмат ба Ватан аслан хизмат кардан ба падару модар ва бародарону хоҳарони машғули меҳнати осоишта мебошад, зеро Ватан ва миллат ду рукни муқаддасе ҳастанд, ки бе онҳо ҳеҷ фард сари баланду ифтихори инсонӣ дошта наметавонад».

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон

Май 6, 2024 18:36

Хабарҳои дигари ин бахш

Дар Душанбе вобаста ба иҷрои Барномаи миллии ташаккули тарзи ҳаёти солим ҷаласа баргузор гардид
Дар Душанбе Конфронси ҷумҳуриявӣ таҳти унвони «Ваҳдат – мароми модарон» баргузор шуд
Дар Душанбе вобаста ба хизматрасониҳои молиявӣ ва ҳуқуқи соҳибкорон конфронси ҷумҳуриявӣ доир гардид
Сафари Корвони «Модарони ваҳдатсаро» ба шаҳру ноҳияҳои ҷумҳурӣ оғоз гардид
Дар Озарбойҷон Конфронси байналмилалии ҳизбҳои сиёсӣ баргузор шуд
Фестивали дӯстии ҷавонон-2025 оғоз шуд
Бахшида ба Рӯзи ҷаҳонии донори хун дар Тоҷикистон маъракаи хунсупорӣ гузаронида шуд
Дар Женева масъалаи кушодани марказҳои раводиди давлатҳои Иттиҳоди Аврупо дар Тоҷикистон баррасӣ гардид
Бахшида ба ҷашни Ваҳдати миллӣ Корвони «Модарони ваҳдатсаро» ташкил мегардад
Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид
То соли 2028 ба ҳама шаклҳои бадтарини меҳнати кӯдакон дар Тоҷикистон хотима дода мешавад
Муовини Сарвазир бо рафти корҳои сохтмонии манзилҳои зист барои оилаҳои аз заминҷунбӣ зарардидаи ноҳияи Рашт шинос шуд