Президенти Тоҷикистон: «Хизматчиёни ҳарбии Қӯшунҳои сарҳадӣ бояд аз таърихи ибратомӯзи миллати тоҷик сабақи ҷоннисориву мардонагӣ омӯзанд»

ДУШАНБЕ, 28.05.2024. /АМИТ «Ховар»/. Сарфармондеҳи Олии Қувваҳои Мусаллаҳи мамлакат, генерали артиш, Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ ба муносибати 30-юмин солгарди таъсиси Қӯшунҳои сарҳадӣ аз муборизаи ватанхоҳонаи яке аз сарлашкарони беҳамтои миллати тоҷик Спитамен ёдоварӣ намуда, қаҳрамониҳои Спитаменро яке аз саҳифаи дурахшони корнамоиву фидокории таърихӣ ба хотири ҳифзи сарзамини аҷдодӣ аз ҳуҷуми аҷнабиён гуфтанд.

«Чунин мисолҳои муборизаву қаҳрамониҳо дар таърихи чандинҳазорсолаи халқамон собит месозанд, ки ҳимояи Ватан дар ҳамаи давру замонҳо барои ҳар фарди бонангу номус ва ватандӯсту ватанпараст, аз ҷумла шумо – сарҳадбонон, ки вориси арзандаи гузаштагони некноми худ мебошед, нишонаи ҷавонмардиву шараф мебошад», — таъкид намуданд Пешвои миллат.

Бинобар ин, хизматчиёни ҳарбии Қӯшунҳои сарҳадӣ, дигар сохторҳои низомӣ ва мақомоти ҳифзи ҳуқуқ бояд аз таърихи ибратомӯзи миллати сарбаланду озодихоҳ, соҳибмаърифату тамаддунсоз ва созандаву ободгари тоҷик сабақи ҷоннисориву мардонагӣ омӯзанд.

Давлат ва Ҳукумати мамлакат ба ҷасорату далерӣ ва хизмати содиқонаву софдилонаи хизматчиёни ҳарбии Қӯшунҳои сарҳадӣ арҷ мегузорад, шуҷоату фидокорӣ ва хизматҳои шоёни фарзандони бонангу номуси Ватанро, ки ҳангоми иҷрои вазифаҳои хизматӣ барои ҳимояи марзҳои кишвар ҷони худро аз даст додаанд, ҳаргиз фаромӯш намекунад.

Дар баробари ин, Ҳукумати мамлакат бо назардошти масъулият ва мушкилоти хизмати марзбонӣ дар қатори дигар сохторҳои низомӣ ва мақомоти ҳифзи ҳуқуқ барои фароҳам овардани шароити мусоид ва боз ҳам беҳтар гардонидани вазъи иҷтимоии онҳо ҳамаи имкониятро равона месозад.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»