«ТОҶИКИСТОНИ МАН!». Дар шаҳри Ҳисор даври дуюми маҳфил-озмун ҷамъбаст карда шуд

ДУШАНБЕ, 17.05.2024. /АМИТ «Ховар»/. Бо ташаббуси Кумитаи иҷроияи Ҳизби Халқии Демократии Тоҷикистон дар шаҳри Ҳисор дар Осорхонаи таърихӣ-кишваршиносии шаҳри Ҳисор даври дуюми маҳфил-озмуни «Тоҷикистони ман!» бо иштироки олимон, аҳли зиё, омӯзгорон ва донишҷӯёну хонандагони муассисаҳои таълимии шаҳри Ҳисор баргузор гардид, иттилоъ доданд ба АМИТ «Ховар» дар Ҳизби Халқии Демократии Тоҷикистон дар шаҳри Ҳисор.

Иброз гардид, ки дар даври аввали маҳфил – озмуни «Тоҷикистони ман!» 746 нафар ва дар даври дуюм 87 нафар иштирок намуданд.

Мақсад аз гузаронидани маҳфил-озмун таҳкими арзишҳои маънавию фарҳангӣ, бедор намудани ҳисси ватандӯстию меҳанпарастӣ, арҷгузорӣ ба забони давлатӣ, эҳтиром ба муқаддасоти миллӣ байни ҷавонон ва наврасон, талқини онҳо барои озодона сухан гуфтан бо забони ноби адабии тоҷикӣ, муаррифии Тоҷикистони азиз ба ҷаҳониён ҳамчун халқи дорои таърихи қадимӣ мебошад.

Озмун байни хонандагони синфҳои 10 ва 11-и муассисаҳои таҳсилоти миёнаи умумӣ ва коллеҷу литсейҳои шаҳри Ҳисор баргузор карда шуд.

Ғолибони маҳфил-озмуни «Тоҷикистони ман!» дар Рӯзи ҷавонони Тоҷикистон бо Диплом ва туҳфаҳои хотиравӣ сарфароз гардонида мешаванд.

АКС: Ҳизби Халқии Демократии Тоҷикистон дар шаҳри Ҳисор