ҶАЛАСАИ ШУРОИ МИЛЛИИ РУШД. Тоҷикистон то соли 2037 ба мамлакати «сабз» мубаддал мегардад

Июнь 13, 2024 18:00

ДУШАНБЕ, 13.06.2024. /АМИТ «Ховар»/. Тавре қаблан иттилоъ додем, дар Душанбе таҳти раёсати  Президенти Ҷумҳурии Тоҷикистон, Раиси Шурои миллии рушд муҳтарам Эмомалӣ Раҳмон бо иштироки шарикони рушд, аз ҷумла Президенти Бонки Исломии Рушд доктор Муҳаммад ал-Ҷасер, муовини Дабири кулли Созмони Милали Муттаҳид ва Котиби иҷроияи Комиссияи иқтисодӣ ва иҷтимоӣ барои минтақаи Осиё ва Уқёнуси Ором Армида Салсия Алишаҳбана, Директор оид ба масъалаҳои глобалии об дар Бонки ҷаҳонӣ Сароҷ Кумар, Директори Генералии Бонки Осиёии Рушд барои минтақаи Осиёи Марказӣ ва Ғарбӣ Евгений Жуков, Раиси Шурои ҳамоҳангсозии шарикони рушд, Роҳбари Намояндагии Гурӯҳи Бонки ҷаҳонӣ Озан Севимли, роҳбарони вазорату кумитаҳои дахлдори Ҳукумати мамлакат ҷаласаи Шурои миллии рушд баргузор гардид.

Дар ҷаласаи Шурои миллии рушд ҷараёни татбиқи фосилавии Стратегияи миллии рушди Ҷумҳурии Тоҷикистон барои давраи то соли 2030 дар доираи Ҳадафҳои рушди устувор мавриди баррасӣ қарор дода шуда, оид ба афзалияти минбаъдаи рушди Тоҷикистон масъалагузорӣ карда шуд.

Пешвои миллат муҳтарам Эмомалӣ Раҳмон оид ба дастовардҳои Тоҷикистон суханронӣ намуда, иттилоъ доданд, ки давоми ҳашт соли татбиқи Стратегияи миллии рушди Ҷумҳурии Тоҷикистон барои давраи то соли 2030 аз ҷониби Ҳукумати мамлакат якчанд ислоҳоти зарурӣ гузаронида шуд.

Ин ислоҳот тақвияти низоми идоракунии давлатӣ, рушди неруи инсонӣ, таъмини сифати рушди иқтисоди миллӣ ва суботи молиявиро дар бар гирифта, ҳоло Тоҷикистон дар марҳалаи дуюми татбиқи стратегия қарор дорад.

Дар баробари ҳисобот оид ба дастовардҳои Ҳукумати мамлакат Президенти Ҷумҳурии Тоҷикистон муҳтарам Эмомалӣ Раҳмон оид ба омилҳои таъсиррасон ба раванд ва ҷараёни татбиқи Стратегияи миллии рушд маълумот  доданд.

Яке аз омилҳои таъсиррасон- ин тағйирёбии иқлим ва сар задани офатҳои табиӣ мебошад. Ба ҳама маълум аст, ки Тоҷикистон бинобар ҷойгиршавии ҷуғрофӣ осебпазир аз офатҳои табиӣ ва ноилоҷ дар сар задани онҳо мебошад. Танҳо соли 2023 дар маҷмуъ, зиёда аз панҷсаду панҷоҳ офати табиӣ, аз ҷумла селу обхезӣ ва ярчу тармафароӣ сабт шуда, иқтисоди миллӣ қариб 100 миллион сомонӣ хисороти молӣ ва моддӣ дидааст.

Пешвои миллат муҳтарам Эмомалӣ Раҳмон дар ҷаласаи Шурои миллии рушд иттилоъ доданд, ки «дар фасли баҳори соли 2024 боришоти пайдарпай ба хоҷагиҳои хонаводагӣ ва кишоварзӣ хисороти зиёд расониданд. Тирамоҳу зимистони гузашта, баръакс, хеле камбориш омад. Ин ҳолат боиси коҳиши манбаъҳои ташаккулёбии захираҳои оби минтақа гардид, ки беш аз 60 фоизи онҳо дар қаламрави Тоҷикистон ҷойгиранд. Аз ин лиҳоз, бо эҳтимоли зиёд имсол низ моро камобиву хушксолӣ дар пеш аст».

Гуфта шуд, ки ҳар сол бо дастгирии шарикони рушд лоиҳаҳои сармоягузории давлатӣ дар самтҳои мутобиқшавӣ ба тағйирёбии иқлим, пешгирии офатҳои табиӣ, соҳилмустаҳкамкунӣ, обёрӣ ва беҳдошти замин, барқарорсозии чарогоҳҳо ва дигар самтҳо амалӣ мешаванд, аммо ин маблағҳо ҳанӯз кофӣ нестанд.

Бо назардошти ин Президенти Ҷумҳурии Тоҷикистон пешниҳод намуданд, ки барои ноил шудан ба натиҷаҳои устувори пешгирӣ аз пайомадҳои манфии офатҳои табиӣ, ислоҳоти соҳаи обтаъминкунӣ ва беҳдошти замин механизмҳои нави маблағгузорӣ таҳия ва амалӣ карда шаванд.

Бо ин мақсад, Ҳукумати мамлакат Барномаи ислоҳоти соҳаи об барои солҳои 2016 – 2025, инчунин Стратегияи рушди иқтисоди «сабз» барои солҳои 2023 – 2037-ро қабул намудааст, ки ба бартараф намудани масъалаҳои ҷойдошта ва рушди устувори соҳаи кишоварзӣ равона карда шудааст.

Дар ҷаласа Сарвари давлат зарурати идомаи ислоҳоти соҳаи кишоварзиро мувофиқ ба стратегияву барномаҳои қабулгардида таъкид намуда, вазифа гузоштанд, ки то соли 2037 Тоҷикистон ба кишвари «сабз» табдил дода шавад.

Хотиррасон мекунем, ки дар ҷаласаи Шурои миллии рушди назди Президенти Ҷумҳурии Тоҷикистон Вазири рушди иқтисод ва савдо, котиби масъули Шуро Завқӣ Завқизода ба иштирокдорони ҷаласа ҷараёни татбиқи фосилавии Стратегияи миллии рушди Ҷумҳурии Тоҷикистон барои давраи то соли 2030-ро муаррифӣ намуд.

 Акрам САНГЗОДА,
АМИТ «Ховар»

Июнь 13, 2024 18:00

Хабарҳои дигари ин бахш

Масъалаи таҳияи Стандартҳои миллии экологӣ, иҷтимоӣ ва идоракунии корпоративӣ дар Тоҷикистон баррасӣ гардид
ТАЪМИНИ АМНИЯТИ ОЗУҚАВОРӢ. Дар Тоҷикистон имсол дар майдони беш аз 6 ҳазор гектар картошка кишт гардид
РУШДИ САНОАТ. Дар корхонаҳои саноатии шаҳри Исфара ҳаҷми истеҳсоли маҳсулот меафзояд
Маркази миллии патенту иттилооти Тоҷикистон ва Ташкилоти патентии Авруосиёӣ ҳамкориро тавсеа мебахшанд
Соли равон дар вилояти Суғд 55559 тонна картошка ва 37415 тонна пиёз ҷамъоварӣ шудааст
Дар Хатлон корхонаи саноатии батареяҳои офтобӣ сохта мешавад
Дар Тоҷикистон ҳаракати воситаҳои нақлиёти вазнин, ки зиёда аз 40 тонна бор интиқол медиҳанд, манъ аст
Намояндаи Тоҷикистон дар ҷаласаи Маркази СММ оид ба содагардонии расмиёти савдо ва тиҷорати электронӣ иштирок намуд
Дар корхонаҳои саноатии ноҳияи Мастчоҳ соли равон ба маблағи беш аз 153 миллион сомонӣ маҳсулот истеҳсол карда шудааст
Коргоҳи «Гулдасти Бӯстон» 3500 либоси мактабӣ истеҳсол менамояд
ТАЪМИНИ АМНИЯТИ ОЗУҚАВОРӢ. Дар Тоҷикистон имсол зиёда аз 196 ҳазор гектар кишти такрорӣ гузаронида мешавад
Ҳаҷми маҷмӯи маҳсулоти минтақавӣ дар шаҳри Ҳисор дар соли равон беш аз 2 миллиард сомониро ташкил дод