Никола Микович: «Тоҷикистон дар дили қитъаи бузурги Осиё ҷойгир аст»

ДУШАНБЕ, 12.06.2024 /АМИТ «Ховар»/. «Ҷумҳурии Тоҷикистон дар дили қитъаи бузурги Осиё ҷойгир буда, дар он захираҳои бойи об мавҷуд аст», — чунин иброз намуд хабарнигори Сербия Никола Микович зимни суҳбат бо мухбири АМИТ «Ховар» дар доираи баргузории Конфронси сеюми байналмилалӣ оид ба Даҳсолаи байналмилалии амал «Об барои рушди устувор, солҳои 2018-2028».

Никола Микович иброз дошт, ки «ман бори аввал аст ба Тоҷикистон меоям. Манзараҳои нотакрор, кӯҳҳои баланд ва ҳавои тозаи ин сарзамин ба ман хеле писанд омад. Баргузории конфронси сеюми сатҳи баланд дар ҳалли масъалаҳои марбут ба мушкилоти об на танҳо барои як минтақа ё Осиёи Марказӣ, балки барои сатҳи ҷаҳон низ хеле муҳим мебошад».

Никола Микович гуфт, ки солҳои охир ҳодисаҳои табиӣ дар гӯшаву канори дунё хеле зиёд ба вуқуъ меоянд, ки ин ҷомеаи ҷаҳонро водор менамояд дар ин самт тадбирҳои муҳим андешад. Ин конфронс ба андешидани тадбирҳои муассир дар сатҳи байналмилалӣ мусоидат менамояд.

Ёдовар мешавем, ки 10 июн дар доираи Конфронси сеюми байналмилалӣ оид ба Даҳсолаи байналмилалии амал «Об барои рушди устувор, солҳои 2018-2028» дар пойтахти мамлакат- шаҳри Душанбе фестивалу форумҳои зиёд доир ба масъалаҳои обу пиряхҳо ва иқлим, аз ҷумла Форуми байналмилалии пиряхҳо, Форуми байналмилалии парлумонӣ таҳти унвони «Захираҳои об ва устувории демографӣ ба манфиати ҷавонон», Форуми байналмилалии зан ва об, Форуми Осиёи Марказӣ таҳти унвони «Об ва тағйирёбии иқлим», Форуми оби Африқо, Форуми бахши хусусӣ, Форуми кӯдакон ва ҷавонон оид ба об ва иқлим, Форуми ташкилоти ҳавзавӣ, Форуми илм ва технология ва Фестивали обу пиряхҳо гузаронида шуданд.

АКС: АМИТ «Ховар»