Президенти Тоҷикистон аз тағйирёбии босуръати иқлим ва оқибатҳои ногувори он изҳори нигаронӣ намуданд

ДУШАНБЕ, 09.09.2024 /АМИТ «Ховар»/.  8 сентябр Пешвои миллат дар Паёми шодбошӣ ба муносибати 33-солагии Истиқлоли давлатии Тоҷикистон аз он изҳори нигаронӣ намуданд, ки бар асари тағйирёбии босуръати иқлим ва оқибатҳои ногувори он – камобиву хушксолии паёпай, офатҳои табиӣ ва паҳншавии бемориҳои сироятӣ сайёра ба мушкилоти бисёр ҷиддӣ рӯ ба рӯ гардидааст.

Ба таъкиди Пешвои миллат, бинобар мушкилоти экологӣ, хусусан чор – панҷ соли охир авзои ҷаҳон торафт мураккабу печида гардида, яроқнокшавии бошитоб, «ҷанги сард», таҳдиду хатарҳои замони муосир, аз ҷумла, терроризму экстремизм, ҷиноятҳои киберӣ ва дигар ҷинояткории муташаккили фаромиллӣ рӯз ба рӯз вусъат пайдо мекунанд.

Сарвари давлат иброз доштанд, ки таъсири манфии таҳдиду хатарҳои муосир ва мушкилоти гуфташуда ба Тоҷикистони азизи мо низ расида истодааст.

Ба андешаи Пешвои миллат, дар чунин давраи ноором мо бояд барои ҳифзи истиқлолу озодӣ ва дастовардҳои он ҳамеша ҳушёру омода бошем ва дар ғафлат намонем.