Дар Душанбе оид ба нақши Конститутсия дар баланд бардоштани маърифати ҳуқуқии ҷомеа ҳамоиш баргузор шуд

ДУШАНБЕ, 24.10.2024. /АМИТ «Ховар»/. Имрӯз дар Донишгоҳи миллии Тоҷикистон бо иштироки намояндагони сохторҳои гуногуни ҷумҳурӣ ва олимону мутахассисони соҳаҳои гуногун таҳти унвони «Нақши Конститутсия дар баланд бардоштани маърифати ҳуқуқии ҷомеа» конференсияи илмӣ-назариявии ҷумҳуриявӣ баргузор гардид. Дар ин хусус ба АМИТ «Ховар» дар Донишгоҳи миллии Тоҷикистон хабар доданд.

Ректори донишгоҳ изҳор дошт, ки қабули Конститутсияи Ҷумҳурии Тоҷикистон ҳамчун рӯйдоди бузургу тақдирсоз дар таърихи навини тоҷикон бо ҳарфҳои заррин сабт гардида, дар пешрафти ҳаёти ҷомеа нақши созгор дорад. Давоми 30 соли қабули Конститутсия ҷиҳатҳои ҳуқуқии тамоми соҳаҳои ҳаёти сиёсӣ, иқтисодӣ, иҷтимоӣ ва фарҳангии мамлакат рушд кард, ки ин ҳама ба сулҳу субот ва пойдории ваҳдати миллӣ дар ҷомеа вобаста аст.

Муовини Сарвазири Ҷумҳурии Тоҷикистон Дилрабо Мансурӣ иброз намуд, ки “Конститутсия қонуни асосӣ ва шаҳодатномаи миллат ба шумор рафта, маҳз дар асоси он зиндагии моддиву маънавии ҷомеа ва фазои мусоиди кору ҳаёти ҳар сокини мамлакат ба танзим медарояд. Конститутсияи Ҷумҳурии Тоҷикистон бо бархурдорӣ аз миллият ва ҷавобгӯ будан ба тамоми ниёзҳои ҷомеаи ҳуқуқбунёди демократӣ дар ҷомеаи ҷаҳонӣ мавқеи хосса дорад”.

Таъкид гардид, ки Истиқлоли давлатии Ҷумҳурии Тоҷикистон дар инкишофи тамоми соҳаҳои фаъолияти ҳаёти ҷомеа, махсусан соҳаҳои сиёсӣ, иқтисодӣ, иҷтимоӣ ва фарҳангӣ дигаргуниҳои амиқ ба вуҷуд овард. Ташаккули маърифат ва тарбияи ҳуқуқии аҳолӣ масъалаи калидии давлату ҳукумат ба ҳисоб рафта, аз рӯзҳои нахустини ба даст овардани Истиқлоли давлатӣ ба ин раванд таваҷҷуҳи хосса равона шуд ва дар ин замина якчанд санади меъёрии ҳуқуқӣ қабул гардид.

Иштирокчиёни ҳамоиш иброз доштанд, ки Конститутсия мазмун ва моҳияти маърифати ҳуқуқиро ифода менамояд. Меъёрҳои конститутсионӣ, ба монанди арзиши олӣ доштани инсон ва ҳуқуқу озодиҳои ӯ, дахлнопазир будани ҳаёт, қадр, номус ва дигар ҳуқуқҳои фитрии инсон, аз ҷониби давлат кафолати ҳифзи ҳуқуқу озодиҳои инсон ва шаҳрванд, сарфи назар аз миллат, нажод, ҷинс, забон, эътиқоди динӣ, мавқеи сиёсӣ, вазъи иҷтимоӣ, таҳсил ва молу мулк, баробарии ҳама дар назди қонун ва суд ва ғайра дар умум ҷавҳари маърифати ҳуқуқиро ташкил медиҳанд.

Аз ин рӯ, баланд бардоштани сатҳи маърифати ҳуқуқии шаҳрвандон аз масоили мубраме аст, ки ҳар шаҳрванд тавассути он бояд ҳуқуқу озодиҳояшро ҳифз ва истифода карда тавонад.

АКС: Донишгоҳи миллии Тоҷикистон