ФУТБОЛ. Дар Душанбе бозиҳои даври сеюми марҳилаи гурӯҳии Лигаи чемпионҳои дуюми Осиё-2024/25 баргузор мешаванд

ДУШАНБЕ, 18.10.2024 /АМИТ «Ховар»/. 22-23 октябр дар Варзишгоҳи марказии ҷумҳуриявии шаҳри Душанбе бозиҳои даври сеюми марҳилаи гурӯҳии Лигаи чемпионҳои дуюми Осиё-2024/25 оид ба футбол бо иштироки бошгоҳҳои Тоҷикистон баргузор мешаванд, хабар медиҳад АМИТ «Ховар» бо истинод ба Федератсияи футболи Тоҷикистон.

22 октябр чемпиони Тоҷикистон- бошгоҳи «Истиқлол»-и шаҳри Душанбе дар гурӯҳи «С» бо дастаи «Ал-Ваҳдат»-и Урдун бозӣ мекунад. Ин бозӣ соати 19:00 оғоз мешавад.

Ноибчемпиони мамлакат- дастаи «Равшан»-и шаҳри Кӯлоб 23 октябр дар доираи бозии даври сеюми гурӯҳи «А» дар Душанбе бо «Трактор»-и Эрон рақобат мекунад. Бозӣ соати 19:00 оғоз мешавад.

Бояд гуфт, ки дар ибтидо ин бозӣ мебоист дар Эрон баргузор мешуд, аммо бошгоҳҳо табодули давр карданд. Дар даври чоруми марҳилаи гурӯҳӣ 6 ноябр «Трактор» ва «Равшан» дар Табрез бозӣ мекунанд.

АКС: Федератсияи футболи Тоҷикистон