СОЛҲОИ РУШДИ САНОАТ. Дар нуҳ моҳ ба маблағи беш аз 36 миллиард сомонӣ маҳсулот истеҳсол шудааст

ДУШАНБЕ, 25.10.2024 /АМИТ «Ховар»/. Корхонаҳои саноатии Тоҷикистон дар нуҳ моҳи имсол якҷо бо соҳибкорони хусусӣ ба маблағи 36,3 миллиард сомонӣ маҳсулот истеҳсол кардаанд, ки ин нишондиҳанда нисбат ба ҳамин давраи соли 2023 (нуҳ моҳи соли 2023) бо нархҳои муқоисавӣ 15,3 фоиз афзудааст. Дар ин хусус ба АМИТ «Ховар» дар Агентии омории назди Президенти Ҷумҳурии Тоҷикистон иттилоъ доданд.

Иттилоъ дода шуд, ки дар ҷумҳурӣ дар нуҳ моҳи соли равон 3692 коргоҳу корхонаи истеҳсолӣ, аз ҷумла дар соҳаҳои истихроҷ 345 адад, коркард- 3175 адад, таъминоти неруи барқ, газ, буғ ва тозакунии ҳаво- 72 адад, таъминоти об ва коркарди партовҳо 100 адад фаъолият намудаанд. Аз ин шумора 1198 адад (32,5 фоиз аз шумораи умумии корхонаҳо) ба вилояти Суғд, 864 адад (23,4 фоиз) ба вилояти Хатлон, 794 адад (21,5 фоиз) ба шаҳри Душанбе, 699 адад (18,9 фоиз) ба ноҳияҳои тобеи ҷумҳурӣ ва 137 адад (3,7 фоиз) ба Вилояти Мухтори Кӯҳистони Бадахшон рост меояд.

Саноат яке аз соҳаҳои калидии иқтисоди мамлакатҳо ва тавлидкунандаи асосии неъматҳои моддӣ ба ҳисоб меравад. Рушди он ба пешрафти бахшҳои дигари иқтисодиёт заминаи мусоид гузошта, нуфузу мавқеи давлатро дар арсаи байналмилалӣ устувор менамояд. Истеҳсолоти саноатӣ назар ба дигар соҳаҳои иқтисод, аз ҷумла кишоварзӣ тадриҷан рушд намуда, саҳми он дар таъмини шуғли аҳолӣ, содироти маҳсулот, афзоиши Маҷмуи маҳсулоти дохилӣ ва дар маҷмуъ рушди иқтисодии мамлакатҳо нақши бузург пайдо кардааст.

Ҳаҷми истеҳсолот дар саноати коркард дар ин давра ба 20,3 миллиард сомонӣ расида, аз он маҳсулоти хӯрокворӣ якҷо бо нӯшокиҳо ва тамоку 7,7 миллиард сомонӣ, истеҳсоли маҳсулоти нассоҷӣ ва дӯзандагӣ 2,3 миллиард сомонӣ, истеҳсоли маҳсулот аз чӯб ва коғаз, фаъолияти табъу нашр 555,7 миллион сомонӣ, истеҳсоли маҳсулоти нафтӣ 46,7 миллион сомонӣ, истеҳсоли маҳсулоти кимиёвӣ 425,0 миллион сомонӣ, ҳар гуна маҳсулоти ғайрифилизии маъданӣ 2,9 миллиард сомонӣ, истеҳсолоти металлургӣ ва истеҳсоли маснуоти тайёри филизӣ 5,4 миллиард сомониро ташкил дод.

Дар моҳҳои январ– сентябри соли 2024 ҳаҷми истеҳсоли маҳсулоти хӯрокворӣ якҷо бо нӯшокиҳо ва тамоку 9,2 фоиз зиёд шуд, ки ин 25,9 фоиз аз ҳисоби истеҳсоли макарон, 30,4 фоиз аз ҳисоби маҳсулоти қаннодӣ ва 16,7 фоиз аз ҳисоби нӯшокиҳои бе спирт ба вуҷуд омадааст.

Дар сохтори ҳаҷми истеҳсоли маҳсулоти саноатии ҷумҳурӣ ҳиссаи ҳаҷми истеҳсоли маҳсулоти саноатии вилоятҳои Суғд (56,5 фоиз) ва Хатлон (23,4 фоиз) афзалият дорад.

АКС аз манбаъҳои боз