Дар Душанбе Форуми байналмилалии молиявӣ баргузор гардид

ДУШАНБЕ, 01.11.2024 /АМИТ «Ховар»/. Бо мусоидат ва дастгирии Ҳукумати Ҷумҳурии Тоҷикистон, Бонки миллии Тоҷикистон ва шарикони рушд дар Душанбе Форуми байналмилалии молиявии «ESG* — ҳамчун омили рушди устувори иқтисоди мамлакат» баргузор гардид, иттилоъ медиҳад АМИТ «Ховар» бо истинод ба Бонки миллии Тоҷикистон.

Дар форум муовини Раиси Бонки миллии Тоҷикистон Гулбаҳор Назирӣ, намояндагони вазорату идораҳои марбутаи мамлакат ва шарикони рушд доир ба рӯзмарра будани мавзуи форум, таҳияи санадҳои дахлдор вобаста ба идоракунии экологӣ, иҷтимоӣ, корпоративӣ (ESG), ташаббусҳои Ҳукумати Ҷумҳурии Тоҷикистон дар ин самт, таҳияи нақшаи гузариш ба ҷанбаҳои “сабз”, рушди бозори вомбаргҳои “сабз” ва ҷорӣ намудани принсипҳои маблағгузории устувор тавассути омӯхтани таҷрибаи хуби байналмилалӣ сухан намуданд.

Дар қисмати ҷаласаҳои пленарӣ мутахассисони вазорату идораҳои давлатӣ, ташкилоти молиявии байналмилалӣ, ташкилоти молиявии қарзӣ ва ширкатҳои рақамии мамлакат оид ба мавзуъҳои «ESG – масъалаҳои ҷорӣ ва таҷрибаҳои беҳтарин дар сармоягузории масъулиятнок», «Парадигмаи нави ESG дар стратегияи сармоягузорӣ дар кишварҳои Осиёи Марказӣ. Вазъи кунунӣ ва рушди минбаъда дар Тоҷикистон», «Инноватсия дар соҳаи хизматрасонии молиявӣ ба корхонаҳои хурду миёна ҳамчун омили ноил шудан ба ҳадафҳои рушди устувор» ҳарф зада, аз таҷрибаҳои худ ҳангоми қабули қарорҳо вобаста ба идоракунии экологӣ, иҷтимоӣ ва корпоративӣ (ESG) бо иштирокдорон табодули назар намуданд.

Дар қисмати муҳокимаҳои панелӣ мавзуъҳои рушди маблағгузории “сабз” дар муассисаҳои молиявии Тоҷикистон, маҳсулоти муосири молиявӣ барои рушди устувор, финтех – ҳамчун омили рушди сармоягузорӣ, рушди соҳибкории занон ва ҷавонон дар асоси принсипҳои ESG – стратегияи дарозмуддат барои бунёди тиҷорати муваффақ ва устувор бо назардошти таҷрибаҳои ҷаҳонӣ ва таҷрибаи беҳтарин барои Тоҷикистон мавриди баррасӣ қарор дода шуданд.

Дар анҷоми форум ба кормандони фаъол ва собиқадори низоми бонкии мамлакат ва чанд ташкилоти қарзии молиявӣ Ифтихорнома ва нишони “Аълочии Ассотсиатсияи ташкилоти маблағгузории Тоҷикистон” тақдим гардид.

АКС: Бонки миллии Тоҷикистон

___________
ESG*— Идоракунии экологӣ, иҷтимоӣ ва корпоративӣ. Он маҷмуи хусусиятҳои идоракунии ширкате мебошад, ки бо ҷалби ширкатҳо ба ҳалли мушкилоти экологӣ, иҷтимоӣ ва идоракунӣ мусоидат менамояд.