Ҳамкорӣ байни Тоҷикистон ва Гурӯҳи кишварҳои рӯ ба тараққии маҳсур дар хушкӣ баррасӣ гардид

ДУШАНБЕ, 14.12.2024 /АМИТ «Ховар»/. 12 декабр мулоқоти Намояндаи доимии Ҷумҳурии Тоҷикистон дар Созмони Милали Муттаҳид  Ҷонибек Ҳикмат бо намояндаи олии Созмони Милали Муттаҳид оид ба Гурӯҳи кишварҳои кам тараққикарда, кишварҳои тараққикунандаи маҳсур дар хушкӣ ва ҷазиракишварҳои хурди рӯ ба тараққӣ Рабаб Фатима доир гардид.

Тавре АМИТ «Ховар» бо истинод ба  Намояндагии доимии Ҷумҳурии Тоҷикистон дар Созмони Милали Муттаҳид хабар медиҳад, мусоҳибон атрофи масъалаҳои ҳамкорӣ байни  Тоҷикистон ва Гурӯҳи кишварҳои рӯ ба тараққии маҳсур дар хушкӣ (LLDC) дар самти обу иқлим, амнияти озуқаворӣ, сармоягузории инфрасохтор, инчунин раванди омодагӣ ба Конфронси Гурӯҳи кишварҳои рӯ ба тараққии маҳсур дар хушкӣ мубодилаи афкор намуда, аҳаммияти пешбурди ин мавзуъҳоро барои минтақа ва чорабиниҳои глобалии он таъкид карданд.

Инчунин зимни мулоқот даъватномаи Вазири корҳои хориҷии Ҷумҳурии Тоҷикистон муҳтарам Сироҷиддин Муҳриддин ба намояндаи олии Созмони Милали Муттаҳид оид ба Гурӯҳи кишварҳои кам тараққикарда, кишварҳои тараққикунандаи маҳсур дар хушкӣ ва ҷазиракишварҳои хурди рӯ ба тараққӣ Рабаб Фатима барои иштирок дар Конфронси байналмилалии сатҳи баланд оид ба ҳифзи пиряхҳо, ки 29-31 майи соли 2025 дар Душанбе баргузор мегардад, тақдим гардид.

АКС: Намояндагии доимии Ҷумҳурии Тоҷикистон дар Созмони Милали Муттаҳид