Дар Исломобод маҷмуи масъалаҳои муносибатҳои тиҷоратию иқтисодии Тоҷикистон ва Покистон баррасӣ гардид

ДУШАНБЕ, 14.12.2024 /АМИТ «Ховар»/. 13 декабр дар шаҳри Исломободи Ҷумҳурии Исломии Покистон мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа ва Вазири федеролии тиҷорати Покистон Ҷам Камол Хон баргузор шуд. 

Тавре АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон хабар медиҳад, дар вохӯрӣ маҷмуи масъалаҳои муносибатҳои тиҷоратию иқтисодии мамлакатҳо баррасӣ гардид.

Ҳамчунин аҳамияти густариши ҳамкорӣ барои истифодаи имконоти бандарҳои баҳрии Покистон ва шабакаҳои мавҷудаи транзитӣ барои тавсеаи тиҷорат дар сатҳи минтақа барои Тоҷикистон таъкид шуд.

13 декабр инчунин Далер Ҷумъа бо президенти Палатаи савдо ва саноати Исломобод Носир Қурайшӣ вохӯрӣ намуд. Ҷонибҳо роҳҳои густариш ва тавсеа додани ҳамкории судманди тиҷоратӣ, иқтисодӣ, саноатӣ ва кишоварзиро мавриди муҳокима қарор доданд.

Гуфта шуд, ки баргузор гардидани Бизнес-форуми Тоҷикистон ва Покистон барои зиёд шудани гардиши савдои дуҷониба заминаи воқеӣ фароҳам меорад.

АКС: Вазорати энергетика ва захираҳои оби Ҷумҳурии Тоҷикистон