Дар Кумитаи телевизион ва радио бахшида ба 30-солагии таъсиси Ҳизби Халқии Демократии Тоҷикистон ҳамоиш доир шуд

ДУШАНБЕ, 18.12.2024. /АМИТ «Ховар»/. 16 декабр дар Кумитаи иҷроияи ибтидоии  «Садо ва Симо»-и Ҳизби Халқии Демократии Тоҷикистон бахшида ба 30-солагии таъсиси Ҳизби Халқии Демократии Тоҷикистон ҳамоиш баргузор шуд. Дар ин хусус ба АМИТ «Ховар» дар Кумитаи телевизион ва радиои назди Ҳукумати Ҷумҳурии Тоҷикистон иттилоъ доданд.

Дар ҳамоиш Раиси Кумитаи телевизион ва радиои назди Ҳукумати Ҷумҳурии Тоҷикистон, Раиси Кумитаи иҷроияи ибтидоии  «Садо ва Симо» Нуриддин Саид иброз намуд, ки «маҳз рисолат, хираду заковати воло ва ояндабинии Пешвои муаззами миллат буд, ки ба ташкили Ҳизби Халқии Демократии Тоҷикистон бо қатъияту ҷасорат иқдом намуданд. Инак, бо гузашти 30 сол ҳизб ҳамчун ниҳоди тавонои сиёсӣ дар мамлакат тавассути сиёсати бунёдкорона ва татбиқи собитқадамонаи ҳадафҳои оинномавӣ ва барномавӣ, бо такя ба масъулиятшиносию иқтидори зеҳнии аъзо ва ҷонибдоронаш омили таҳкимбахши раванди созандагию бунёдкории ҷомеаи Тоҷикистони соҳибистиқлол гардид».

Ҳизби Халқии Демократии Тоҷикистон зодаи истиқлоли мамлакат буда, аз умқи дилу тафаккури мардум реша мегирад. Он аз рӯзҳои аввали таъсис ҳимояи манфиатҳои халқро ҳадафи асосӣ қарор дода, барои зиндагии босаодати миллат ва ободии Ватан зери шиори «Барои ваҳдат, рушди устувори иқтисодӣ ва зиндагии шоистаи мардум» саъю талош менамояд. Бешубҳа, ин ҳизб дар заминаи идеяҳои созандаю ваҳдатофари миллӣ ба майдони сиёсат ворид гардида, борҳо ин афзалияти хешро собит намуд.

Ҳамчунин дар Кумитаи иҷроияи ибтидоии  «Садо ва Симо»-и Ҳизби Халқии Демократии Тоҷикистон озмуни “Мақолаи беҳтарин” таҳти унвони «30 сол — барои пешрафт ва зиндагии шоистаи мардум!» бахшида ба 30-солагии таъсиси Ҳизби Халқии Демократии Тоҷикистон ҷамъбаст гардид.

Дар озмуни “Мақолаи беҳтарин” ҷойи якум насиби Олиҳа Давлатзода аз ташкилоти ибтидоии ҳизбии “Илм ва табиат”, ҷойи дуюм насиби Маъруф Назарзода аз ташкилоти ибтидоии ҳизбии “Симо”, Бунафша Юсуфӣ аз ташкилоти ибтидоии ҳизбии “Шаҳнавоз” ва ҷойи сеюм насиби Исматуллои Ҳабибулло аз ташкилоти ибтидоии ҳизбии “Баҳористон”, Неъматулло Давлатов аз ташкилоти ибтидоии ҳизбии “Садо” гардид. Дар фазои танданавӣ ба ғолибон Диплом ва мукофотпулиҳо тақдим  шуданд.

Дар фарҷом ба як зумра аъзои Кумитаи иҷроияи ибтидоии  «Садо ва Симо»-и Ҳизби Халқии Демократии Тоҷикистон Ифтихорнома ва сипосномаҳои Кумитаи иҷроияи Ҳизби Халқии Демократии Тоҷикистон дар шаҳри Душанбе,  Кумитаи иҷроияи Ҳизби Халқии Демократии Тоҷикистон дар ноҳияи Исмоили Сомонӣ ва Кумитаи иҷроияи ибтидоии  «Садо ва Симо» тақдим гардид.

АКС: Кумитаи телевизион ва радиои назди Ҳукумати Ҷумҳурии Тоҷикистон