Аз ҳавзаи интихоботии якмандатии Панҷакент, №21 номзад ба вакилии Маҷлиси намояндагони Маҷлиси Олии Ҷумҳурии Тоҷикистон пешбарӣ гардид

ДУШАНБЕ, 10.01.2025 /АМИТ «Ховар»/. Дар маҷлиси Кумитаи иҷроияи Ҳизби Халқии Демократии Тоҷикистон /ҲХДТ/ дар шаҳри  Панҷакент бо иштироки муовини Раиси Ҳизби Халқии Демократии Тоҷикистон Мирзоқосим Каримзода вазифаҳои ташкилоти ибтидоии ҳизбӣ барои тарғиб ва татбиқи нуктаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон баррасӣ шуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент иттилоъ медиҳад.

Дар маҷлис Ситоди пешазинтихоботии назди Кумитаи иҷроияи ҳизбии шаҳр ташкил шуда, аъзои Кумитаи иҷроияи шаҳрии ҳизб номзадии Парвиз Шодизодаро ба вакилии Маҷлиси намояндагони Маҷлиси Олӣ аз ҳавзаи интихоботии якмандатии Панҷакент, №21 пешбарӣ намуданд.

Муовини Раиси Ҳизби Халқии Демократии Тоҷикистон Мирзоқосим Каримзода номзади ташкилоти ҳизбии шаҳр ба вакилии Маҷлиси намояндагони Маҷлиси Олӣ Парвиз Шодизодаро ба ҳозирон муаррифӣ намуда, нуктаҳои асосии барномаи пешазинтихоботии Ҳизби Халқии Демократии Тоҷикистонро шарҳу тавзеҳ дод.

АКС: Мақомоти иҷроияи ҳокимияти давлатии шаҳри Панҷакент