Пагоҳ дар Душанбе ҷашни Сада ва намоиши тухмии зироати кишоварзӣ баргузор мегардад

ДУШАНБЕ, 31.01.2025. /АМИТ «Ховар»/. Пагоҳ, 1 феврал дар Боғи фарҳангию фароғатии ба номи Абулқосим Фирдавсии шаҳри Душанбе ҷашни Сада ва намоиши тухмии зироати кишоварзӣ бо афрӯхтани гулхан, намоиши маҳсулоти кишоварзӣ, аз қабили тухмии зироат, хӯрокҳои миллӣ, гулу буттаҳои ороишӣ, ниҳолҳои мевадиҳанда ва ҳамешасабз, техникаҳои соҳавӣ ва  техникаҳои кишоварзӣ баргузор мегардад, иттилоъ медиҳад АМИТ «Ховар».

Тавре аз маркази матбуоти Вазорати кишоварзӣ   иттилоъ доданд,  дар даромадгоҳи ҷашнгоҳ гулхан, ки рамзи ин ид аст, афрӯхта мешавад. Дар атрофи  он сокинон ва меҳмонони пойтахт метавонанд шодмонӣ намоянд. Инчунин дар ҳар гӯшаи он кишоварзон аз минтақаҳои гуногуни мамлакат маҳсули бо ранҷ парваридаи худро, ки хоси он минтақа мебошад, инчунин тухмии зироат, хӯрокҳои миллӣ, гулу буттаҳои ороиширо   пешниҳоди сокинон гардонида, техникаҳои соҳавӣ,  техникаҳои кории кишоварзӣ ва дигар маҳсулотеро, ки ифодагари  ҷашни Сада мебошанд,  ба  намоиш мегузоранд.

Ҷашни Сада тибқи «Ҷадвали баргузории солгард, фестивали намоиш, иду озмунҳои фарҳангию маърифатӣ ва анъанаю ҳунарҳои мардумӣ дар Ҷумҳурии Тоҷикистон» дар асоси амри Президенти Ҷумҳурии Тоҷикистон аз 2 январи соли 2025 гузаронида мешавад.

Олимон иброз медоранд, ки ҷашни Сада – рамзи  рӯшноӣ ва пирӯзии инсон бар табиат аст. Сада яке аз ҷашнҳои қадимӣ ва пурмуҳтавои мардуми ориёӣ мебошад, ки таърихи тӯлонӣ дорад. Ин ҷашн рамзи пайдоиши нур, гармӣ ва пирӯзии инсон бар сардию зулмот дониста мешавад.

Ин ҷашн инчунин ҳамчун василае барои муттаҳид сохтани мардум хизмат мекунад. Инсонҳо бо ҳамдигар бо нияти нек ҷамъ меоянд ва якдигарро бо гармӣ ва муҳаббат табрик мегӯянд.

Дар ин рӯз сокинону меҳмонон метавонанд аз олимони соҳаи кишоварзӣ вобаста ба парвариши гулу бутта, дарахтон ва дигар маҳсулоти киштшаванда тавсияҳо гиранд.

АКС: АМИТ «Ховар»