«ПАЁМ-РОҲНАМОИ ОЯНДАИ ПУРСАМАР». Таҳти ин унвон дар Китобхонаи миллии Тоҷикистон ҳамоиш доир шуд

ДУШАНБЕ, 11.01.2024. /АМИТ «Ховар»/. Бо ташаббуси шуъбаи тарғиб ва барномаҳои фарҳангии Муассисаи давлатии «Китобхонаи миллӣ» бахшида ба шарҳи нуктаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» таҳти унвони «Паём-роҳнамои ояндаи пурсамар» ҳамоиш баргузор шуд, иттилоъ медиҳад АМИТ «Ховар».

Дар ҳамоиш таъкид шуд, ки Паёми Президенти Ҷумҳурии Тоҷикистон ба Маҷлиси Олӣ дар баланд бардоштани сатҳи некуаҳволии мардум, тақвияти ҳифзи иҷтимоии аҳолӣ, ҳимояи ҳуқуқу озодиҳои инсон ва шаҳрванд, паст кардани сатҳи камбизоатӣ, инкишофи соҳаҳои гуногуни ҳаёти мамлакат, инчунин дар рушди Тоҷикистони соҳибистиқлол нақши бориз дорад.

Вакили Маҷлиси намояндагони Маҷлиси Олии Ҷумҳурии Тоҷикистон Гавҳар Шарофзода ииброз дошт, ки дар Паёми Президенти Тоҷикистон ба Маҷлиси Олӣ самтҳои асосии сиёсати дохилию хориҷии мамлакат барои давраҳои оянда муайян шуда, оид ба пешбурди манфиатбори сиёсати хориҷӣ ва таъмини пешрафти соҳаҳои иқтисоду саноат, энергетика, роҳу нақлиёт, амнияту мудофиа, ҳифзу ҳукуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш ва сайёҳӣ вазифаҳои мушаххас ба миён гузошта шуданд.

Дар вохӯрӣ таъкид гардид, ки Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии мамлакат дастури роҳнамо барои тамоми сокинон арзёбӣ гардида, ҳуҷҷати рӯйимизии ҳар шахс мебошад. Дар Паёми Президенти Ҷумҳурии Тоҷикистон ба Маҷлиси Олӣ самтҳои асосии сиёсати дохилӣ ва хориҷии мамлакат дар соли 2024 натиҷагирӣ шуда, вазифаҳои мушаххаси рушди ҷумҳурӣ дар солҳои минбаъда муайян карда шуданд.

Изҳор гардид, ки бо Амри Президенти Ҷумҳурии Тоҷикистон муҳтарам Эмомалӣ Раҳмон соли 2024 баргузор ва муваффақона  ҷамъбаст гардидани Озмуни ҷумҳуриявии «Фурӯғи субҳи доноӣ китоб аст» бори дигар собит намуд, ки дар баробари тадбирҳои гуногун андешидани чораҳои ҳавасмандӣ ба раванди мутолиаи китоб дар ҷомеа мусоидат намуда, боиси эҳё ва рушди фарҳанги китобхонӣ мегардад. Он ҳамзамон таваҷҷуҳи аҳли ҷомеаро ба масъалаҳои муҳимми соҳаи китобдорӣ ҷалб менамояд.

Сарвари давлат бо назардошти аҳаммияти ин озмун дар баланд бардоштани сатҳи маънавиёти мардум пешниҳод намуданд, ки «ҳар сол озмуни «Фурӯғи субҳи доноӣ китоб аст» баргузор намуда, ба он доираи ҳарчи васеътари ҷомеа ҷалб ва бобати ҳавасмандсозии ғолибон аз мактаб сар карда, то мақомоти маҳалливу марказии ҳокимияти давлатӣ чораҷӯӣ карда шавад. Яъне вазоратҳои маориф ва илм, фарҳанг, вазорату идораҳое, ки дар сохторашон муассисаҳои таълимӣ доранд, роҳбарони мақомоти маҳаллии ҳокимияти давлатии вилоятҳо ва шаҳру ноҳияҳо вазифадор карда мешаванд, ки минбаъд ҳар сол озмуни «Фурӯғи субҳи доноӣ китоб аст»-ро аз рўйи се самт: якум — миёни тарбиягирандагон ва хонандагони муассисаҳои таҳҳсилоти томактабӣ ва миёнаи умумӣ; дуюм — таҳсилоти ибтидоӣ, миёна ва олии касбӣ ва сеюм — дар байни калонсолон васеъ ба роҳ монанд».

АКС: АМИТ «Ховар»