Дар Ҳисор сохтмони кӯдакистон ва се муассисаи таҳсилоти умумӣ идома дорад

ДУШАНБЕ,02.02.2025 /АМИТ «Ховар»/. Дар партави дастуру супоришҳои Президенти мамлакат муҳтарам Эмомалӣ Раҳмон дар шаҳри Ҳисор бо иқдоми мақомоти иҷроияи ҳокимияти давлатии шаҳр дар ҳамкорӣ бо соҳибкорон дар ҳудуди Ҷамоати деҳоти Ҳисор сохтмони як муассисаи таҳсилоти томактабӣ барои 250 кӯдак, дар ҳудуди ҷамоатҳои деҳоти Мирзо Ризо, Навобод ва дар шаҳраки Шарора се муассисаи таҳсилоти умумӣ идома дорад. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад.

Зимни шиносоии роҳбарияти шаҳри Ҳисор бо ҷараёни корҳои сохтмонии муассисаи томактабӣ дар Ҷамоати деҳоти Ҳисор, масъулин иттилоъ доданд, ки биноҳои муассисаҳои мазкурро давоми соли 2025 ва ибтидои соли нави таҳсили 2025-2026 сохта, мавриди баҳрабардорӣ қарор медиҳанд.

Бояд тазаккур дод, ки Президенти Ҷумҳурии Тоҷикистон дар Паём ба Маҷлиси Олии Ҷумҳурии Тоҷикистон бо таваҷҷуҳ ба рушди соҳаи маориф ва бо дарназардошти афзоиши аҳолӣ ба Ҳукумати мамлакат, Вазорати маориф ва илм ва роҳбарони мақомоти иҷроияи маҳаллии ҳокимияти давлатӣ дастуру супориш доданд, ки дар панҷ соли оянда бо истифода аз ҳамаи сарчашмаҳои маблағгузорӣ барои фарогирии 50 фоизи кӯдакони синусоли томактабӣ бунёди 800 муассисаи таҳсилоти томактабӣ ва беш аз 1000 муассисаҳои таҳсилоти умумӣ тадбирҳои зарурӣ андешанд.

АКС: Мақомоти иҷроияи ҳокимияти давлатии шаҳри Ҳисор