Дар Тоҷикистон талафоти неруи барқ коҳиш ёфтааст
ДУШАНБЕ, 12.02.2025. /АМИТ «Ховар»/. Соли 2024 талафоти неруи барқ дар неругоҳҳои барқи обӣ ва марказҳои барқу гармдиҳии Ҷамъияти саҳомии кушодаи «Барқи тоҷик» дар маҷмуъ 73,7 миллион кВт-соат ё 0,42 фоизи барқи истеҳсолшударо ташкил дод. Ин нишондиҳанда нисбат ба соли 2023 мутаносибан 1,1 миллион кВт-соат ё ба андозаи 0,03 фоиз коҳиш ёфтааст. Дар ин хусус раиси Ҷамъияти саҳомии кушодаи «Барқи тоҷик» Маҳмадумар Асозода зимни нишасти матбуотӣ иттилоъ дод.
Бо мақсади беҳтар намудани таъминоти неруи барқ соли 2024 Ҷамъияти саҳомии кушодаи «Барқи тоҷик» аз дигар истеҳсолкунандагони мустақили дохили ҷумҳурӣ ва хориҷи мамлакат дар ҳаҷми 4 миллиарду 947,7 миллион кВт-соат неруи барқ харидааст. Ҳаҷми хариди неруи барқ нисбат ба соли 2023 207,0 миллион кВт-соат кам мебошад. Хариди неруи барқ асосан аз неругоҳҳои барқи обии «Сангтӯда-1», Неругоҳи барқи обии «Сангтӯда-2» ва Неругоҳи барқии обии «Роғун» мебошад.
Маҳмадумар Асозода иброз намуд, ки бо дастгирии Ҳукумати Ҷумҳурии Тоҷикистон бо мақсади ноил гардидан ба иҷрои ҳадафҳои стратегии мамлакат, аз ҷумла таъмини истиқлолияти энергетикӣ ва баланд бардоштани эътимоднокии фаъолияти иншооти истеҳсолӣ бо ҷалби сармояи шарикони рушд дар айни замон якчанд лоиҳа дар соҳаи электроэнергетика татбиқ мегардад. Аз ҷумла, татбиқи лоиҳаи «Барқарорсозии Неругоҳи барқи обии «Норак», ки 2 июни соли 2017 оғоз гардида, анҷоми он 31 декабри соли 2026 пешбинӣ гардидааст. Лоиҳаи «Таҷдиди Неругоҳи барқи обии «Қайроққум», ки 25 июли соли 2014 оғоз гардида, анҷоми он баъд аз тамдид 31 декабри соли 2026 пешбинӣ шудааст. Инчунин лоиҳаи «Таҷдиди Неругоҳи барқи обии «Сарбанд бо иқтидори 240 МВт», ки 23 декабри соли 2013 оғоз гардида, 31 декабри соли 2024 ба анҷом расонида шуд.
Соли 2024 дар неругоҳҳо ва марказҳои истеҳсоли барқу гармии Ҷамъияти саҳомии кушодаи «Барқи Тоҷик» ҳаҷми истеҳсоли неруи барқ дар маҷмуъ 17 миллиарду 420,5 миллион кВт-соатро ташкил дод, ки нисбат ба соли 2023 941,5 миллион кВт-соат зиёд мебошад.
Фирӯза ДАВЛАТЗОДА,
АМИТ «Ховар»
АКС: АМИТ «Ховар»
Масоили таъсиси корхонаи истеҳсоли триоксиди сурма дар Тоҷикистон баррасӣ гардид
Дар Душанбе ҷаласаи дуюми Шурои миллии об баргузор шуд
Дар шаҳри Душанбе қабул ба «Школа 21» оғоз гардид
56 корхонаи коммуналии Тоҷикистон пурра ба низоми биллингӣ пайваст шудааст
«Тоҷикстандарт»: аз харидани об ва нӯшокиҳое, ки зери таъсири нурҳои Офтоб қарор доранд, худдорӣ намоед!
«Shohin Airlines» бо «Airbus» барои харидани чор ҳавопаймои силсилаи A320neo созишномаи ҳамкорӣ ба имзо расонид
Дар вилояти Суғд неругоҳи барқи офтобӣ бо иқтидори умумии 200 МВт бунёд карда мешавад
Ташаббусҳои байналмилалии Пешвои миллат дар таҳкими сулҳи ҷаҳонӣ ва рушди маърифати ҳуқуқӣ баррасӣ шуданд
Дар Брест ҷаласаи 19-уми Комиссияи байниҳукуматии Тоҷикистону Беларус баргузор мегардад
НИШАСТИ МАТБУОТӢ. Раёсати Кумитаи бехатарии озуқавории вилояти Хатлон ба 520 намуна шаҳодатномаи сифати тухмӣ дод
Байни соҳибкорони Тоҷикистон ва Узбекистон ҳамоишҳо доир мегарданд
НИШАСТИ МАТБУОТӢ. Тоҷикистон бо шарикони рушд 17 созишномаи қарзию грантӣ ба имзо расонид
