Дар Душанбе дар мавзуи «Чакан-мероси беназири тоҷикон» ҳамоиши ҷумҳуриявӣ доир шуд

Март 18, 2025 17:40

ДУШАНБЕ, 18.03.2025. /АМИТ «Ховар»/.  Дар Донишгоҳи технологии Тоҷикистон таҳти унвони «Чакан-мероси беназири тоҷикон» ҳамоиши ҷумҳуриявӣ баргузор гардид. Дар ин хусус ба АМИТ «Ховар» аз ин донишгоҳ хабар доданд.

Дар ҳамоиш намунаи офаридаҳои устодону донишҷӯёни донишгоҳ дар самти тарроҳии муосири чакан ва атласу адрас, кашидадӯзӣ ва дигар ҳунарҳои миллӣ ба маърази тамошо гузошта шуд.

Зимни ҳамоиш иброз гардид, ки дар замони муосир раванди ҷаҳонишавӣ доираи муносибатҳои байналмилалӣ ва майдони равобити фарҳангиро фарох намуда, зарурати эҳёи анъанаҳои фарҳанги миллӣ ва беҳдошти асолати онҳоро тақозо менамояд. Дар ин замина рушди фарҳанги миллӣ барои таҳаввули муносибатҳои байнидавлатӣ дар самти эҳёи ҳунарҳои бадеии халқӣ ва ҳифзи мероси фарҳангии ғайримоддӣ аҳамияти муҳим дорад.

«Ҳар гуле, ки дар чакан бо сӯзан меофаранд, гӯё дунёест, ки асрҳо бегазанд дар шуури мо нақш бастааст ва он нишони ривоҷи ҷаҳони маънавӣ, ҳадафҳои инсонгароӣ ва миллӣ мебошад. Инчунин он аз фарҳанги ғании халқи тоҷик дарак дода, таҷассуми шукуфоии дунёи бепоён ва ояндаи инсоният аст»,-иброз шуд дар ҳамоиш.

Чакан ҳамчун либоси миллии тоҷикон таърихи хеле қадимӣ дошта, ҳар рамзи он роҳи тайкардаи миллат дар шебу фарози таърихро ифода менамояд.

Ҳамчунин иброз гардид, ки яке аз қадимтарин матое, ки дар он нақшҳои чакан таҷассум ёфтааст, ҳангоми корҳои бостоншиносӣ аз ҳудуди ноҳияи Фархор ёфт гардид. Ҳоло он дар Осорхонаи мардумшиносии назди Институти таърих, бостоншиносӣ ва мардумшиносии ба номи Аҳмади Дониши Академияи миллии илмҳои Тоҷикистон ҳифз ва муаррифӣ карда мешавад. Ҳар нақши ин бозёфт далели он аст, ки халқи тоҷик аз қадим зебоипарасту фарҳангсолор будааст.

Дар ҳамоиш занону духтарон даъват шуданд, ки  либосии миллии тоҷикиро бештар таблиғ намуда, дар ҳифз ва нигаҳдошти он саҳм гузоранд.

АКС: Донишгоҳи технологии Тоҷикистон

Март 18, 2025 17:40

Хабарҳои дигари ин бахш

Ҷаласаи Шурои ҳукуматӣ оид ба рушди кинематографияи миллӣ баргузор гардид
Дар Душанбе сохтмони яке аз иншооти зеботарин дар Осиёи Марказӣ -Театри миллӣ идома дорад
Барандагони Ҷоизаи байнидавлатии «Ситораҳои Иттиҳод»-ҷоизаи асосии башардӯстонаи ИДМ эълон шуданд
Аз Ҳисор 58 нафар ба даври минтақавии озмуни «Тоҷикистон-Ватани азизи ман» роҳхат гирифтанд
Ба ифтихори 115-солагии Шоири халқии Тоҷикистон Боқӣ Раҳимзода дар Осорхонаи миллӣ намоиш ташкил мешавад
«РОҒУН-КОХИ НУР». Дар Осорхонаи миллии Тоҷикистон намоиши асарҳои рассомон ифтитоҳ ёфт
Муовини аввали Президенти Ҷумҳурии Исломии Эрон бо таъриху тамаддуни тоҷикон шинос гардид
Дар доираи Фестивал-озмуни «Парасту» се намоиш манзури тамошобинон гардонида мешавад
Ба Осорхонаи миллии Тоҷикистон туҳфаҳои нодир тақдим карда шуданд
ҚАҲРАМОНИ ТОҶИКИСТОН. Асарҳои офаридаи Садриддин Айнӣ шаҳодатномаи миллатанд
Дар шаҳри Ганҷа консерти ансамбли эстрадии Оркестри давлатии симфонии Тоҷикистон баргузор гардид
ОСОРХОНАИ УСТОД САДРИДДИН АЙНӢ. Сайре ба қадамҷои бузургони миллат