ФУТБОЛ. Дастаи мунтахаби Тоҷикистон ба муқобили дастаи мунтахаби Беларус бозӣ менамояд

ДУШАНБЕ, 19.03.2025 /АМИТ «Ховар»/. Пагоҳ, 20 март, соати 16:00 дар Варзишгоҳи марказии шаҳри  Душанбе вохӯрии дӯстонаи дастаи мунтахаби футболи Тоҷикистон бо дастаи мунтахаби Беларус баргузор мешавад. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Ба ин муносибат дар арафаи бозии байналмилалии дӯстона байни  дастаҳои мунтахаби Тоҷикистон ва Беларус дар меҳмонхонаи «Румӣ»-и шаҳри Душанбе ҷаласа баргузор шуд.

Дар ҷаласа, ки бо иштироки намояндагони Федератсияи футболи Тоҷикистон ва менеҷерони дастаҳо доир шуд, ҷанбаҳои умумии ташкилии вохӯрии дарпешистода баррасӣ гардиданд. Ҳамзамон ранги либоси ҷонибҳо интихоб шуд.

Дастаи мунтахаби Тоҷикистон бо либоси сафед ва дастаи мунтахаби  Беларус бо либоси сабз ба майдон мебароянд.

АКС: Федератсияи футболи Тоҷикистон