ГУЛИ СИЯҲГӮШИ ҚОШГАРДОН. Дар Тоҷикистон мавсими гулгардонӣ фаро расид

ДУШАНБЕ, 12.03.2025 /АМИТ «Ховар»/. Имрӯзҳо дар талу теппа ва даштҳои Тоҷикистон аввалин гулҳои баҳорӣ, аз ҷумла сияҳгӯш маъмул ҳамчун гули наврӯзӣ шукуфта аз фарорасии Иди Наврӯз дарак медиҳад.

Бояд гуфт, ки дар домани кӯҳу саҳро шукуфтани нахустин гули баҳорӣ – сияҳгӯш аввалин муждаи наздикшавии Иди Наврӯз аст. Дар ин айём бачаҳои 10 ‐ 15 сола ба кӯҳу пуштаҳо рафта, гулҳои сияҳгӯш ва дигар гулҳои баҳорӣ чида, хона ба хона мегарданд ва маросими гулгардониро ба ҷо меоваранд.

Бачаҳо гулҳои сияҳгӯш ва дигар гулҳои баҳориро ба як чӯби дароз, ки тақрибан 1,5 м дарозӣ дорад мебанданд ва бо он ба хонаҳои мардум рафта, сурудхонон аз омадани баҳор мужда мерасонанд:

Гули сияҳгӯши қошгардон,
Табақ пур куну пас гардон,
Бидеҳ бар дасти гулгардон,
Баҳори нав муборак бод!

Соҳибхонаҳо гули сияҳгӯшро ба даст гирифта, ба чашм молида, шукрона мекарданд, ки ба баҳори нав расиданд. Мардум аз рӯи таомули аҷдодӣ ба онҳо шодиёна, аз қабили ширинӣ, тухм, қурут ва хушкмева медиҳанд.

Маросими гулгардонӣ дар тамоми минтақаҳои Тоҷикистон ва байни тоҷикони Осиёи Марказӣ аз кадим то имрӯз маҳбубияти хоса дорад.

АКС аз манбаъҳои боз