Кишоварзони вилояти Хатлон дар 124 ҳазор гектар пунбадона кишт менамоянд

ДУШАНБЕ, 18.03.2025. /АМИТ «Ховар»/. Кишоварзони вилояти Хатлон имсол дар 124,5 ҳазор гектар кишти пунбадона мегузаронанд, ки аз ин 41 ҳазор гектараш кишти зери плёнка мебошад.

Тавре ба АМИТ «Ховар» аз хадамоти матбуоти Раиси вилояти Хатлон иттилоъ доданд, ин усул ба коҳиши хароҷот ва афзоиши ҳосил мусоидат менамояд. Ҳангоми истифодаи технологияи зери плёнка ҳосилнокӣ то ба 58 сентнер аз ҳар гектар мерасад, ки нисбат ба усули анъанавӣ бештар аст.

Ҳамчунин дар хоҷагиҳои деҳқонии «Ҷамолиддин» ва «Уралбобо»-и ноҳияи Дӯсти кишти пунбадона оғоз гардид. Хоҷагиҳо дар алоҳидагӣ 13 гектар замини корам дошта, дар 7 гектари он бо усули муосир пунбадона кишт намуданд.

Бо истифодаи технологияҳои муосир ва андешидани тадбирҳои зарурӣ имкон аст, ки дар вилоят ҳосилнокии пахта боз ҳам беҳтар шуда, бахши кишоварзӣ рушд ёбад.

АКС: Хадамоти матбуоти Раиси вилояти Хатлон