Тавсеаи ҳамкории кишоварзӣ байни Тоҷикистон ва Узбекистон дар Тошканд баррасӣ гардид

ДУШАНБЕ, 13.03.2025 /АМИТ «Ховар»/. Таҳкими ҳамкории кишоварзӣ байни Тоҷикистон ва Узбекистон, хусусан доир намудани машварати кишоварзони Тоҷикистон ва Узбекистон зимни мулоқоти Сафири Фавқулода ва Мухтори Ҷумҳурии Тоҷикистон дар Ҷумҳурии Узбекистон Абдуҷаббор Раҳмонзода бо Вазири кишоварзии Ҷумҳурии Узбекистон Иброҳим Абдураҳмонов дар Тошканд баррасӣ гардид. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Ҷумҳурии Узбекистон иттилоъ медиҳад.

Ҷонибҳо масъалаҳои дастрас намудани чигити аълосифат, навъҳои тухмии гандуму шолӣ, ниҳолҳои тут, техникаҳои зарурии кишоварзӣ, ба анҷом расонидани корҳо дар самти бунёди «Боғи дӯстӣ», суръатбахшии раванди сохтмони корхонаи «Абрешим», бунёди боғи таҷрибавӣ дар вилояти Суғд, инчунин ҳамкорӣ бо кишоварзони вилояти Хатлонро баррасӣ намуданд.

Дар анҷом мусоҳибон аз раванди ҳамкорӣ дар соҳаи кишоварзӣ изҳори қаноатмандӣ намуда, иброз доштанд, ки дар оянда барои рушди он саъю кӯшиш менамоянд.

АКС: Сафорати Ҷумҳурии Тоҷикистон дар Ҷумҳурии Узбекистон