Байни коллеҷҳои Душанбе ва Алмато шартномаи ҳамкорӣ ба имзо расид

ДУШАНБЕ, 09.04.2025 /АМИТ «Ховар»/. 7 апрел дар Қазоқистон байни Коллеҷи информатика ва техникаи компютерии шаҳри Душанбе ва Коллеҷи техникӣ-инноватсионии шаҳри Алмаато шартномаи ҳамкорӣ ба имзо расид. Дар ин хусус ба АМИТ «Ховар» аз Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон хабар доданд.

Имзои ин санад заминаи муҳими рушди ҳамкории дуҷонибаро дар самти табодули донишҷӯён ва устодон, такмили ихтисос, мубодилаи таҷриба, барномаҳои дудипломдор, таъсиси факултетҳои муштарак, ҳамкории илмӣ-таҳқиқотӣ ва татбиқи лоиҳаҳои муштараки илмӣ фароҳам меорад.

Инчунин он ба таҳкими ҳамкории судманди академӣ ва рушди соҳаи миёнаи касбӣ байни Тоҷикистон ва Қазоқистон мусоидат менамояд.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон