Дар Донишгоҳи миллии Тоҷикистон бахшида ба имзои Эъломияи Хуҷанд ҳамоиши илмӣ баргузор гардид

ДУШАНБЕ, 03.04.2025. /АМИТ «Ховар»/. Дар Донишгоҳи миллии Тоҷикистон бахшида ба имзои Эъломияи Хуҷанд оид ба дӯстии абадӣ ва нақши он дар таҳкими ҳамкории дӯстонаи давлатҳои Тоҷикистон, Қирғизистон ва Узбекистон ҳамоиши илмӣ баргузор гардид. Дар ин хусус ба АМИТ «Ховар» аз ин донишгоҳ хабар доданд.

Ректори донишгоҳ, доктори илмҳои ҳуқуқшиносӣ, профессор Эмомалӣ Насриддинзода аз иқдоми таърихии Президенти Ҷумҳурии Тоҷикистон муҳтарам Эмомалӣ Раҳмон дар арафаи ҷашни Наврӯзи байналмилалӣ ёдовар шуд.

Таъкид гардид, ки  сафари давлатии Пешвои миллат ба Ҷумҳурии Қирғизистон, ба имзо расидани Фармони Президенти Ҷумҳурии Тоҷикистон дар бораи бахшиши ҷазо, таҷлили Наврӯзи байналмилалӣ бо иштироки сарони давлатҳои Тоҷикистон, Қирғизистон, Узбекистон ва имзои Эъломияи Хуҷанд оид ба дӯстии абадӣ аз иқдоме мебошанд, ки рамзи сулҳ, ваҳдат, инсондӯстӣ ва пешрафти давлату минтақа ба ҳисоб мераванд.

Иброз гардид, ки Эъломияи Хуҷанд оид ба дӯстии абадӣ барои рушди ҳамкории минбаъда шароити мусоид фароҳам меорад. Он марҳилаи нав дар раванди таърихии ҳамкории минтақавӣ ба ҳисоб меравад.

Тавре Сарвари давлат муҳтарам  Эмомалӣ Раҳмон иброз намуданд, «мо ба анъанаҳои деринаву созандаи ҳамзистии дӯстонаи мардумони Осиёи Марказӣ содиқ мемонем. Бо ин мақсад дар муносибатҳоямон бо кишварҳои ҳаммарз ба пешбурди сиёсати дӯстӣ, ҳамсоягии нек, адами мудохила ба корҳои дохилии якдигар, истифодаи воситаҳои дипломативу сиёсӣ дар ҳалли масъалаҳои баҳснок, аз ҷумла масъалаҳои сарҳадӣ ва обу энергетика афзалияти комил хоҳем дод».

АКС: Донишгоҳи миллии Тоҷикистон