Дар шаҳри Душанбе иҷрои «Барномаи фишанги ҳамоҳангсозии сиёсат» баррасӣ гардид

ДУШАНБЕ, 05.04.2025. /АМИТ «Ховар»/. Раванди иҷрои «Барномаи фишанги ҳамоҳангсозии сиёсат» (PCI) ва дигар масоили ҳамкорӣ дар мулоқоти роҳбарияти Бонки миллии Тоҷикистон бо ҳайати Хазинаи Байналмилалии Асъор дар шаҳри Душанбе баррасӣ гардид. Дар ин хусус ба АМИТ «Ховар» аз Бонки миллии Тоҷикистон иттилоъ доданд.

Дар мулоқот Раиси Бонки миллӣ Фирдавс Толибзода иброз намуд, ки Бонки миллии Тоҷикистон «Барномаи фишанги ҳамоҳангсозии сиёсат» -ро муваффақона амалӣ намуда истодааст.

Дар вохӯрӣ ҷонибҳо доир ба дурнамои иқтисодӣ ва тадбирҳои Бонки миллии Тоҷикистон дар самти таҳкими сиёсати иқтисодӣ, идораи самараноки захираҳои байналмилалӣ ва таъсири онҳо ба татбиқи сиёсати пулию қарзӣ, рушди бозори асъор, муътадилии сатҳи таваррум, устувории бахши молиявӣ мубодилаи афкор намуданд.

Ҳамчунин дар ҷараёни вохӯрӣ доир ба иҷрои тавсияҳои ҳайати Хазинаи Байналмилалии Асъор ва раванди иҷрои «Барномаи фишанги ҳамоҳангсозии сиёсат», ки бо назардошти ислоҳоти афзалиятнок бо мақсади таъмини рушди устувори иқтисодӣ ва ҷалби сармояи хориҷӣ ба иқтисодиёти мамлакат таҳия гардидааст, табодули назар намуданд.

АКС: Бонки миллии Тоҷикистон