Тақвияти ҳамкории Тоҷикистон ва Қазоқистон дар самти технологияҳои иттилоотӣ баррасӣ гардид

ДУШАНБЕ, 04.04.2025 /АМИТ «Ховар»/. Истифодаи таҷрибаи Тоҷикистон ва Қазоқистон дар самти технологияҳои иттилоотӣ зимни   мулоқоти директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо ва Сафири Фавқулода ва Мухтори Ҷумҳурии Қазоқистон дар Ҷумҳурии Тоҷикистон Валихан Туреханов  дар шаҳри Душанбе баррасӣ гардид. Дар ин хусус АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад. 

Ҷонибҳо масъалаи бозомӯзии ҷавонон дар самти илмӣ–амалӣ ва тақвияти ҳамкории муштаракро дар оянда матраҳ намуданд.

Сафири Фавқулода ва Мухтори Ҷумҳурии Қазоқистон дар Тоҷикистон омодагии ниҳодҳои дахлдори  Қазоқистонро барои тақвияти ҳамкорӣ бо Агентии инноватсия ва технологияҳои рақамии назди Президенти Ҷумҳурии Тоҷикистон баён дошт.

Дар анҷом ҷонибҳо барои пайгирии масъалаҳои баррасишуда ва андешидани тадбирҳои амалӣ ба мувофиқа расиданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон