Бахшида ба Рӯзи ҷаҳонии футбол дар варзишгоҳи «Вахш» фестивали бошукуҳ гузаронида шуд

ДУШАНБЕ, 22.05.2025. /АМИТ «Ховар»/. Бахшида ба Рӯзи ҷаҳонии футбол дар Варзишгоҳи марказии шаҳри Бохтар бо ташаббуси Клуби футболи «Вахш» дар ҳамкорӣ бо бахши кор бо ҷавонони шаҳр  фестивали идона баргузор гардид. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Фестивал бо бозиҳои намоишӣ, машқҳои кушод, озмунҳои шавқовар ва баромади варзишии кӯдакон пурра гардид. Ҳамзамон ба кӯдакони иштирокчӣ туҳфаҳои хотиравӣ тақдим карда шуданд, ки боиси хурсандии онҳо гардид.

Рӯзи ҷаҳонии футбол эълон шудани 25 май бо ибтикори Президенти Федератсияи футболи Тоҷикистон муҳтарам Рустами Эмомалӣ рӯйдоди таърихӣ ва сарнавиштсоз барои ҷомеаи ҷаҳонии футбол маҳсуб мешавад.

Рӯзи ҷаҳонии футбол ба имконияти нав барои ҳамгироии бештар, ҷалби наврасону ҷавонон ба футбол ва таҳкими ҷойгоҳи Тоҷикистон дар харитаи ҷаҳонии варзиш табдил хоҳад ёфт.

Ин гуна чорабиниҳои варзишӣ ба рушди футбол дар сатҳи маҳал ва ҷалби бештари ҷавонон ба ҳаёти солим мусоидат менамоянд.

АКС: Федератсияи футболи Тоҷикистон