Дар Тоҷикистон баҳогузории глобалии низоми омори миллӣ идома дорад

ДУШАНБЕ, 26.05.2025. /АМИТ «Ховар»/. Шуруъ аз 22 май дар Тоҷикистон ҳайати коршиносон оид ба баҳогузории глобалии низоми омори миллӣ ба кор оғоз намуд, ки то 28 май идома меёбад.

Тавре аз Агентии омори назди Президенти Ҷумҳурии Тоҷикистон ба АМИТ «Ховар» иттилоъ доданд, баҳогузории глобалии низоми омори миллӣ ба рушди соҳаи омори давлатӣ мусоидат менамояд.

Агентии омори назди Президенти Ҷумҳурии Тоҷикистон чун мақоми ваколатдор дар самти татбиқи сиёсати давлатӣ дар соҳаи омор фаъолият бурда, ҷамъоварӣ ва паҳн намудани маълумотро дар асоси Қонуни Ҷумҳурии Тоҷикистон «Дар бораи омори давлатӣ» аз 12 январи соли 2010 амалӣ менамояд. Дар  Тоҷикистон нишондиҳандаҳои омории миллӣ ба меъёрҳои байналмилалӣ мутобиқ гардида, дар сатҳи миллӣ ва байналмилалӣ муаррифӣ карда мешаванд.

Дар баҳогузории глобалии низоми омори миллии Тоҷикистон коршиносон аз Комиссияи иқтисодии Созмони Милали Муттаҳид барои Аврупо, Омори Аврупо, Ассотсиатсияи савдои озоди Аврупо  ва намояндагони мақомоти омор аз Норвегияю Исландия иштирок доранд.

АКС: Агентии омори назди Президенти Ҷумҳурии Тоҷикистон