Донишгоҳи байналмилалии забонҳои хориҷии Тоҷикистон хатмкунандагонро ба муассисаҳои таълимӣ равона намуд

ДУШАНБЕ, 13.05.2025. /АМИТ «Ховар»/. Донишгоҳи байналмилалии забонҳои хориҷии Тоҷикистон ба номи Сотим Улуғзода ба муассисаҳои таълимии мамлакат 123 хатмкунандаи таҳсилоти шартномавӣ, 117 хатмкунандаи таҳсилоти буҷавӣ ва хатмкунандагони Квотаи Президентии Ҷумҳурии Тоҷикистонро равона намуд. Дар ин хусус ба АМИТ «Ховар» аз маркази матбуоти Вазорати маориф ва илми Тоҷикистон хабар доданд.

Тақсимот мутобиқ ба қонунгузории амалкунанда бо назардошти ихтисос, хоҳиш ва имконияти воқеии минтақаҳо амалӣ гардид. Ин иқдом дар самти тақвияти сифати таълим ва таъмини муассисаҳои таҳсилоти миёнаи умумӣ бо мутахассисони ҷавон қадами муҳим арзёбӣ гардид.

Ҷалби кадрҳои ҷавон ба муассисаҳои таълимии мамлакат, хусусан дар минтақаҳои дурдаст аҳамияти калон дорад. Зеро таҳкими заминаи кадрии соҳаи маориф яке аз самтҳои афзалиятноки сиёсати давлатии Тоҷикистон дар ин самт ба ҳисоб меравад.

АКС: Маркази матбуоти Вазорати маориф ва илми Ҷумҳурии Тоҷикистон