Фестивали байналмилалии театрҳои касбӣ «Наврӯз» дӯстдорони санъати театрро ҷамъ овард
ДУШАНБЕ, 03.05.2025. /АМИТ «Ховар»/. 2 май дар Театри давлатии академии опера ва балети ба номи Садриддин Айнӣ Фестивали байналмилалии театрҳои касбӣ «Наврӯз» бо иштироки ҳайатҳои театрии давлатҳои Арманистон, Озарбойҷон, Федератсияи Русия, Қазоқистон, Узбекистон, Эрон ва Тоҷикистон оғоз гардид, иттилоъ медиҳад мухбири АМИТ «Ховар» бо истинод ба Вазорати фарҳанги Ҷумҳурии Тоҷикистон.
Зимни ифтитоҳи фестивал Вазири фарҳанги Ҷумҳурии Тоҷикистон Матлубахон Сатториён иброз дошт, ки «ин чорабинии фарҳангӣ боиси хушҳолии аҳли санъати халқи тоҷик аст. Зеро имрӯз ин фестивал дӯстдорони санъати театрро аз дохил ва хориҷи мамлакат ҷамъ оварда, беҳтарин намоишномаҳо пешниҳоди тамошобинон мегарданд».
Иброз гардид, ки Фестивали байналмилалии театрҳои касбӣ «Наврӯз»бо мақсади тавсеаи робитаҳои фарҳангӣ, табодули таҷриба ва дар ин замина такмил додани маҳорату малакаи ҳунарӣ, огоҳӣ ёфтан аз дастовардҳои эҷодии ҳамдигар ва фароҳам овардани шароити мусоид барои рушди санъати театрӣ доир мешавад.
«Театри тоҷик дар солҳои Истиқлоли давлатӣ ба пешравӣ ва комёбиҳои назаррас ноил гардид. Рӯйи саҳна овардани намоишҳои хотирмон, ки имрӯз аз ҷониби тамошобин хуш қабул гардида истодааст , далели ин гуфтаҳо мебошад»,- афзуд Матлубахон Сатториён.
Театр дар ҷомеа рисолати бузурге бар дӯш дорад. Аз ин хотир ҳар халқу миллате, ки ба театр арҷ мегузорад, бо забону фарҳанги худ дар олам шинохтаю пешоҳанг аст. Театр қодир аст, ки ба умқи дили инсонҳо роҳ ёфта, онҳоро ба ҷаҳони андеша водор созад ва дар ташаккули руҳу равон ва маънавиёти онҳо таъсир расонад.
Президенти Ҷумҳурии Тоҷикистон муҳтарам Эмомалӣ Раҳмон дар яке аз суханрониҳо чунин иброз доштаанд: «Театр воситаи пуриқтидортарини таъсиррасонӣ ба тафаккури инсон аст, зеро рӯйдодҳои зиндагиро дар саҳна дида, тамошобин худро хаёлан ба қаҳрамонҳои мусбат монанд мекунад ва бо ҳамин роҳ олами ботинии хешро мустақилона комил мегардонад».
Дар маросими ифтитоҳи фестивал операи «Рӯдакӣ»-и Шарофиддин Сайфиддинов пешниҳод гардид. Ин намоиш аввалин бор соли 1976 рӯйи саҳна омада, аз ҷониби тамошобинон хуб қабул гардид. Намоиш аз тарафи мунаққидон сазовори баҳои баланд гардида, то имрӯз дар саҳнаи театр гузошта мешавад.
Имрӯз, 3 май, соати 11:00 намоиши «Одоби шикори рӯбоҳ»-и Театри Ҷумҳурии Исломии Эрон дар Театри давлатии ҷавонони ба номи М. Воҳидов ва соати 17:30 намоиши «Никоҳи пинҳон»-и Театри давлатии академии мусиқии бачагонаи Москва ба номи Наталя Сатс дар Театри давлатии академии опера ва балети ба номи Садриддин Айнӣ пешниҳоди тамошобинон гардонида мешавад.
Ёдовар мешавем, ки фестивали байналмилалӣ 6 май, соати 17:30 дар Театри давлатии академии опера ва балети ба номи Садриддин Айнӣ ҷамъбаст мегардад.
АКС: АМИТ «Ховар»
Пешвои миллат Эмомалӣ Раҳмон: «24 ёдгории таърихию фарҳангии Тоҷикистон ба Феҳристи мероси моддии ҷаҳонии ЮНЕСКО сабт гардидааст»
Президенти Тоҷикистон: «Мо барои арҷгузорӣ ба арзишҳои асили тамаддуни тоҷикону форсизабонон иқдомоти муассирро амалӣ намудем»
ШЕЪР ВА ИСТИҚЛОЛ. Назми муосири тоҷик дар солҳои соҳибистиқлолии Тоҷикистон дар сафи пеши худшиносии миллӣ ва ҳаракати ваҳдати миллӣ қарор гирифт
Кормандони соҳаи фарҳанг бо мукофотҳои давлатӣ сарфароз гардиданд
Се китоби рӯзномаи «Ҷумҳурият»: «Эмомалӣ Раҳмон ва эҳёи тамаддуни ориёӣ», «Бозгашти қаҳрамон» ва «Бозгашти қаҳрамон 2» муаррифӣ гардид
Конференсияи ҷумҳуриявии «Забон рукни муҳимми Истиқлоли давлатӣ ва ҳамбастагии ҷомеа» баргузор гардид
Дар Озмуни байналмилалии «Санъати китоб» «Шоҳнома»-и Абулқосим Фирдавсӣ сазовори Шоҳҷоиза гардид
35 СОЛИ СОҲИБИСТИҚЛОЛӢ. Дар Тоҷикистон соли 1991 танҳо 15 театр фаъолият мекард
«Эмомалӣ Раҳмон — муаррифгари таърихи ниёгон ва тамаддуни навини тоҷикон». Таҳти ин унвон китоб ба нашр расид
Дар шаҳри Душанбе маҳфили «Шоҳномахонӣ» баргузор шуд
«ТОҶИ СОМОН». Қабули филмҳо барои иштирок дар синамоҷашнвораи миллӣ то 15 сентябр идома меёбад
«МОДАРНОМА». Дар Осорхонаи миллӣ намоиши асарҳои Рассоми халқии Тоҷикистон Сабзаалӣ Шариф ифтитоҳ ёфт
