Китоби «Устод Айнӣ, таърих, сиёсат» ба нашр расид

ДУШАНБЕ, 17.05.2025 /АМИТ «Ховар»/. Китоби нави номзади илмҳои филологӣ, сармуҳаррири нашрияи «Омӯзгор» Эҳсон Сафарзода таҳти унвони «Устод Айнӣ, таърих, сиёсат» ба табъ расид, хабар медиҳад АМИТ «Ховар».

Дар саҳифаи нахустини китоб таъкид карда шудааст, ки се асари мукаммали таърихию адабии устод Садриддин Айнӣ – «Таърихи инқилоби фикрӣ дар Бухоро», «Таърихи амирони манғитияи Бухоро» ва «Таърихи инқилоби Бухоро» намунаи нахустин ва олии асари таърихию публитсистӣ ба ҳисоб мераванд. Ҳар се асар дар як давраи кӯтоҳ – аз соли 1918 то соли 1921 эҷод шуда, доир ба ин асарҳо дар адабиётшиносӣ ва публитсистикаи тоҷик таҳқиқоти фарогир анҷом дода нашудааст.

Ҳадаф аз таҳқиқи асарҳои «Таърихи инқилоби фикрӣ дар Бухоро», «Таърихи амирони манғитияи Бухоро» ва «Таърихи инқилоби Бухоро» ва таҳияи китоби «Устод Айнӣ, таърих, сиёсат» муайян намудани аҳамияти сиёсии рисолаҳои таърихии Садриддин Айнӣ ва таъсири онҳо дар худшиносӣ ва ҳувияти миллӣ мебошад.

Эҳсон Сафарзода муаллиф ва мураттиби 12 монография, дастури таълимӣ ва китоби илмию таълимӣ, инчунин муаллифи беш аз 200 мақолаи илмӣ, публитсистӣ ва таълимию тарбиявӣ мебошад. Қаблан монографияю китобҳои «Ҳувияти миллӣ дар осори публитсистии Садриддин Айнӣ», «Устод Айнӣ ва ҳувияти миллӣ», «Нақши Садриддин Айнӣ дар ташаккули ҳувияти миллии тоҷикон», «Назаре ба публитсистикаи сиёсии устод Айнӣ», «Президент, истиқлол, ваҳдат, маориф», «Муаррифгари миллати тоҷик» ва чанде дигарро ба табъ расонидааст.

АКС: АМИТ «Ховар»