КОНФРОНСИ БАЙНАЛМИЛАЛИИ САТҲИ БАЛАНД ОИД БА ҲИФЗИ ПИРЯХҲО. Чӣ тавр зеҳни сунъӣ расмҳои кӯдаконро ба санъати рақамӣ табдил медиҳад?

ДУШАНБЕ, 28.05.2025 /АМИТ «Ховар»/. Дар доираи Конфронси байналмилалии сатҳи баланд оид ба ҳифзи пиряхҳо Намоишгоҳи байналмилалии «Тағйир додани мушкилоти пиряхҳо ба роҳҳои ҳал» баргузор мегардад, хабар медиҳад АМИТ «Ховар».

Намоишгоҳ дар доираи Конфронси байналмилалии сатҳи баланд оид ба ҳифзи пиряхҳо баргузор шуда,  платформаи калидӣ барои табодули дониш, намоиши дастовардҳои илмӣ, технологияҳо ва ҷалби дастгирии ҷомеа хоҳад буд.

Ҳадафи ин намоишгоҳ баланд бардоштани сатҳи огоҳӣ, ошкор кардани миқёси коҳиши пиряхҳо ва оқибатҳои он – экологӣ, иҷтимоӣ ва иқтисодӣ, муаррифии таҳқиқоти муосир оид ба мониторинг ва ҳифзи пиряхҳо, нақши онҳо дар иқлим ва системаҳои обҳои ҷаҳонӣ, рушди шарикӣ байни кишварҳо, олимон, созмонҳо ва ҷомеаҳои маҳаллӣ, ҷалби аудиторияи васеъ тавассути намоишгоҳҳои интерактивӣ, барномаҳои санъат ва таълимӣ, намоиш додани ҳалли муосир: мониторинги моҳвораӣ, дронҳо, платформаҳои рақамӣ ва технологияҳои дигар мебошад.

Дар намоишгоҳ доираи васеи иштирокчиён, аз ҷумла созмонҳои байналмилалӣ ва минтақавӣ, ниҳодҳои молиявӣ, вазорату идораҳои давлатӣ, мақомоти маҳаллӣ, созмонҳои ғайриҳукуматӣ, ширкатҳои хусусӣ, муассисаҳои илмӣ-таҳқиқотӣ ва дигар ҷонибҳои манфиатдор ҷамъ меоянд.

Ҳамчунин намоишгоҳи бадеӣ баргузор мешавад, ки барои баланд бардоштани садои кӯдакон аз фанновариҳои муосир ва абзорҳои зеҳни сунъӣ истифода мешавад.

Ёдовар мешавем, ки дар остонаи конфронс кӯдакон аз тамоми гӯшаву канори Тоҷикистон дар бораи пиряхҳо ва тағйирёбии иқлим расму андешаҳояшонро пешниҳод намуданд. Бо ёрии зеҳни сунъӣ онҳо ба асарҳои рақамии санъат табдил ёфтанд. Дар намоишгоҳ ин асарҳои хаёлӣ намоиш дода мешаванд. Онҳо дар бораи он ки кӯдакон буҳрони иқлимро чӣ гуна қабул мекунанд, маълумот медиҳанд.

Тасвири ниҳоии якҷоя, ки аз ҷониби зеҳни сунъӣ дар асоси тамоми кори кӯдакон офарида шудааст, ба таври рамзӣ пирях (ё сайёра) ва инчунин паёми илҳомбахшро дар бораи ҳифзи табиат тасвир менамояд.

Ҳамаи ин чорабиниҳо дар ҳамкорӣ бо Ҳукумати Тоҷикистон ва бо дастгирии шарикони байналмилалӣ (аз ҷумла Иттиҳоди Аврупо, Дафтари инноватсионии ЮНИСЕФ, GIZ, САҲА ва UNFPA) ташкил карда мешаванд.

Тавассути форум ва намоиши лоиҳаҳо созмондиҳандагон мехоҳанд, ки кӯдакону наврасон иштирокчиёни пешбари конфронси ҳифзи пиряхҳо бошанд.

Зарангези ЛАТИФ,
АМИТ «Ховар»

АКС аз манбаъҳои боз