«Корвони саломатӣ». Ба сокинони деҳоти дурдасти вилояти Суғд хизмати ройгони тиббӣ расонида шуд

ДУШАНБЕ, 12.05.2025. /АМИТ «Ховар»/. Барои сокинони деҳоти дурдасти вилояти Суғд дар доираи маъракаи солимгардонии «Корвони саломатӣ» ёрии тиббии ройгон расонида шуд. Дар ин хусус ба АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иттилоъ доданд.

Зимни баргузории «Корвони саломатӣ»  аз ҷониби табибони дилшинос, ҷарроҳони дилу рагҳои хунгард ва аритмолог шаҳрвандон аз  муоинаи тиббӣ гузаштанд. Шаҳрвандон ҳамзамон ба таври ройгон аз ташхиси эхокардиография ва сабти барқии дил гузаронида шуданд.

Дар ин рӯз ба мутахассиси дилшинос 498 нафар, ҷарроҳи дил — 19 нафар ва ба ҷарроҳи рагҳои хунгард 18 нафар муроҷиат намуданд.

Ҳадафи иқдоми «Корвони саломатӣ» расонидани хизмати тиббии баландсифат ба сокинони минтақаҳои дурдаст мебошад. Иқдом ба ошкор кардани бемориҳои эҳтимолӣ ва таъйин намудани табобати саривақтӣ равона шудааст.

АКС: Вазорати тандурустӣ ва ҳифзи иҷтимоии аҳолии Ҷумҳурии Тоҷикистон