Омӯзгори фанни химия аз Варзоб дар даври минтақавии озмуни «Омӯзгори соли Тоҷикистон» сазовори ҷойи якум гардид

ДУШАНБЕ, 01.05.2025. /АМИТ «Ховар»/. Омӯзгори фанни химияи Муассисаи таҳсилоти миёнаи умумии рақами 39-и ноҳияи Варзоб Ҷамшед Неъматов дар даври минтақавии озмуни «Омӯзгори соли Тоҷикистон-2025» сазовори ҷойи якум гардид. Дар ин хусус ба АМИТ «Ховар» аз Донишкадаи ҷумҳуриявии такмили ихтисос ва бозомӯзии кормандони соҳаи маориф хабар доданд.

Даври минтақавии озмун дар Донишкадаи ҷумҳуриявии такмили ихтисос ва бозомӯзии кормандони соҳаи маориф баргузор гардид. Иброз гардид, ки иқдоми беназири Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба баланд бардоштани мақому манзалати омӯзгор дар ҷомеа имкон дод, ки ҳазорон нафар донишҷӯён, муҳаққиқон ва омӯзгорону кормандони соҳаи маориф ва илм дар озмунҳои гуногун иштирок намуда, дар татбиқи сиёсати маорифпарваронаи Президенти мамлакат саҳм  гузоранд.

Дар ҷамъбасти даври минтақавии Озмуни ҷумҳуриявии «Омӯзгори соли Тоҷикистон» омӯзгорону навовару эҷодкор кӯшиш намуданд, ки маҳорату малака нишон дода, дар даврҳои минбаъдаи озмун сабқат намоянд. Ҷараёни озмун шаффоф ва тибқи талаботи Низомномаи озмун баргузор гардид.

Таъкид  гардид, ки таҷрибаи ҳамаи довталабон ҳамчун таҷрибаи пешқадам мавриди омӯзиш қарор гирифта, дар семинару омӯзишҳо ва тренингҳои донишкада омӯзонида мешавад.

АКС: Донишкадаи ҷумҳуриявии такмили ихтисос ва бозомӯзии кормандони соҳаи маориф