Ҳайати Тоҷикистон дар ҷаласаи 71-уми ҷаласаи Комиссияи Аврупоии Созмони умумиҷаҳонии сайёҳӣ иштирок намуд

ДУШАНБЕ, 06.06.2025. /АМИТ «Ховар»/. Раиси Кумитаи рушди сайёҳии назди Ҳукумати Ҷумҳурии Тоҷикистон Ҷамшед Ҷумъахонзода дар ҷаласаи 71-уми Комиссияи Аврупоии Созмони умумиҷаҳонии сайёҳӣ, ки дар шаҳри Бокуи Ҷумҳурии Озарбойҷон баргузор гардид, иштирок намуд.

Тавре аз Кумитаи рушди сайёҳии назди Ҳукумати Ҷумҳурии Тоҷикистон ба АМИТ «Ховар» хабар доданд, дар доираи ҷаласа Ҷамшед Ҷумъахонзода бо Раиси Агентии давлатии сайёҳии Озарбойҷон Фуад Нагиев ва роҳбарони ҳайати Ҷумҳуриҳои Узбекистон, Қазоқистон, Швейтсария, Туркия, Булғористон, Юнон ва Гурҷистон вохӯрӣ намуд.

Ҳамчунин вобаста ба баргузории Форуми глобали сармоягузории сайёҳӣ дар шаҳри Душанбе, вохӯрии Раиси Кумитаи рушди сайёҳӣ бо директори коммисияи Аврупо Кордула Вохлматер ва директори иҷроияи Созмони умумиҷаҳонии сайёҳӣ Наталия Байона доир гардид.

Ёдовар мешавем, ки Ҷумҳурии Тоҷикистон аз соли 2007 инҷониб ба узвияти Созмони умумиҷаҳонии сайёҳӣ пазируфта шуд.

АКС: Кумитаи рушди сайёҳии назди Ҳукумати Ҷумҳурии Тоҷикистон