Дар Бохтар вобаста ба пешгирии ғарқшавии ноболиғону ҷавонон ҳангоми оббозӣ вохӯрии иттилоотӣ доир шуд

Июнь 19, 2025 15:15

ДУШАНБЕ, 19.06.2025. /АМИТ «Ховар»/. Дар шаҳри Бохтар бо мақсади ҷалби таваҷҷуҳи  омӯзгорон,  донишҷӯён ва падару модарон  ба масъалаҳои пешгирии ҳодисаҳои фавқулода, бахусус ғарқшавии кӯдакон ва ҷавонон дар мавсими шиноварӣ, бо иштироки намояндагони мақомоти корҳои дохилии вилояти Хатлон ва омӯзгорону донишҷӯёни Муассисаи давлатии таълимии Коллеҷи тиббии шаҳри Бохтар вохӯрии иттилоотӣ баргузор шуд.

Дар ҷамъомад иброз гардид, ки сабабҳои асосии ҳолатҳои нохуш, пеш аз ҳама шиноварии худсарона дар маконҳои обии мамнуъ, риоя накардани қоидаҳои бехатарӣ ҳангоми шиноварӣ, инчунин беэътиноии баъзе волидайн нисбат ба рафтор ва фаъолияти фарзандон мебошад.

Иттилоъ дода шуд, ки аз аввали соли 2025 то нимаи моҳи июн дар шаҳру ноҳияҳои вилояти Хатлон 48 ҳолати ғарқшавӣ ба қайд гирифта шуд. Ин рақам аз он шаҳодат медиҳад, ки масъалаи назорат ва корҳои фаҳмондадиҳӣ дар ин самт то ҳол нокифоя аст.

«Дар шароити иқлимии минтақа, ки ҳар сол дар мавсими гармо сатҳи хатари чунин ҳодисаҳо боло меравад, зарурати тақвияти корҳои фаҳмондадиҳӣ ва назоратӣ аз ҷониби ҳамаи субъектҳои масъул – аз оила сар карда,  то муассисаҳои таълимӣ хеле муҳим мебошад»,- таъкид гардид  дар вохӯрӣ.

Зимни ҷамъомад  ба донишҷӯён Муассисаи давлатии таълимии «Коллеҷи тиббии шаҳри Бохтар» тартибу қоидаҳои амалии кӯмакрасонӣ ва барқарорсозии фаъолияти ҳаётан муҳими ҷабрдидагон дар шароити саҳроӣ (дар соҳили дарё ё обанбор) шарҳ дода шуд. Аз ҷумла,  риояи  қоидаҳои зерин  ҳангоми расонидани кумаки аввалин ба ғарқшудагон инҳоянд:

– ба таври дуруст аз об берун овардани шахси ғарқшуда;

– санҷиши аломатҳои ҳаётӣ (нафаскашӣ ва набз);

– дар ҳолати набудани нафас ва набз – фавран оғоз намудани нафаси сунъӣ ва масҳи дил;

– даъвати ёрии таъҷилӣ ва таъмини шароити бехатар то расидани мутахассисон.

АКС: Раёсати Вазорати корҳои дохилӣ дар вилояти Хатлон

Июнь 19, 2025 15:15

Хабарҳои дигари ин бахш

Имрӯз аз нашри нахустин шумораи маҷаллаи «Бонувони Тоҷикистон» 19 сол сипарӣ гардид
ИСТИҚЛОЛИ ДАВЛАТӢ — ВОСИТАИ МУАССИРИ ЭЪТИРОФ. Барои ҳар шахси озодихоҳ неъмате муқаддастар аз он нест
Имрӯз дар ноҳияҳои алоҳидаи Тоҷикистон чангу ғубор ба амал меояд
Бахшида ба Истиқлоли Тоҷикистон ҳамоиши кормандони соҳаи таҳсилоти ибтидоӣ ва миёнаи касбӣ доир шуд
ТАНТАНАҲОИ ҶАШНИ ИСТИҚЛОЛИЯТ. Дар шаҳру ноҳияҳои мамлакат барномаҳои фарҳангӣ доир мегарданд
«МегаФон Life» – доимо дар алоқа, ҳатто вақте ки паёмрасонҳои муқаррарӣ дастнорасанд
Имрӯз дар шаҳри Душанбе ҳаво то 36 дараҷа гарм мешавад
Дар хоҷагиҳои кишоварзии Ҳисор маъракаи пахтачинӣ оғоз гардид
Дар Иссиқкӯл Бозиҳои XXIV байналмилалии варзишии кишварҳои ИДМ ва СҲШ баргузор мешаванд
Имрӯз дар водиҳои Тоҷикистон ҳаво то 38 дараҷа гарм мешавад
Дар Мастчоҳ вохӯрии вакили Маҷлиси намояндагон бо интихобкунандагон доир шуд
Мутахассисони алоқа «таҳаввулоти рақамӣ» пешбинӣ менамоянд