Кормандони Корхонаи воҳиди давлатии «Роҳи оҳани Тоҷикистон» Рӯзи Ваҳдати миллиро таҷлил намуданд

ДУШАНБЕ, 26.06.2025 /АМИТ «Ховар»/. Бахшида ба Рӯзи Ваҳдати миллӣ дар Корхонаи воҳиди давлатии «Роҳи оҳани Тоҷикистон» бо иштироки роҳбарият ва кормандони  соҳа ҷамъомади тантанавӣ баргузор гардид, иттилоъ медиҳад АМИТ «Ховар» бо истинод ба КВД «Роҳи оҳани Тоҷикистон».

Дар ҷамъомади тантанавӣ роҳбарияти КВД «Роҳи оҳани Тоҷикистон»  доир ба нақши муҳим ва таърихии Президенти Ҷумҳурии Тоҷикистон муҳтарам Эмомалӣ Раҳмон дар истиқрори сулҳу ваҳдати миллӣ, таҳкими пояҳои давлатдорӣ,   инчунин таъмини соҳибихтиёрии Тоҷикистон сухан намуд. Иброз гардид, бо  имзои Созишномаи умумии  истиқрори сулҳ ва ризоияти  миллӣ 27 июни соли 1997  дар мамлакат суботи комил барқарор гардид  ва он оғози ободкориҳо гардид.

Ин санади сарнавиштсоз маротибаи дигар сулҳдӯсту ваҳдатофар будан ва  хиради азалӣ доштани мардуми тоҷик, хоса Пешвои миллатро ба ҷаҳониён собит  намуд. Ин аст, ки  таҷрибаи сулҳофарии тоҷикон дар ҳалли як қатор низоъҳои дохилӣ дар ҷаҳон истифода мегардад.

Ҳамзамон дар ҷамъомади  тантанавӣ иштирокдорон доир ба нақши Созишномаи умумии истиқрори сулҳ ва ризояити миллӣ дар ҷумҳурӣ, саҳми Пешвои миллат дар таҳкими  сулҳу субот, рушду пешрафти соҳаҳои гуногуни иқтисодиёти мамлакат ибрози назар намуданд.

АКС: КВД «Роҳи оҳани Тоҷикистон»