Шараф Шерализода дар иҷлосияи 59-уми Шурои ҳуқуқи инсони СММ иштирок намуд

ДУШАНБЕ, 18.06.2025 /АМИТ «Ховар»/. 16 июн Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария, намояндаи доимии Ҷумҳурии Тоҷикистон дар назди Шуъбаи Созмони Милали Муттаҳид ва дигар созмонҳои байналмилалӣ дар Женева Шараф Шерализода дар бахши сатҳи баланди иҷлосияи 59-уми Шурои ҳуқуқи инсони Созмони Милали Муттаҳид иштирок намуд.

Тавре ба АМИТ «Ховар» аз Сафорати Ҷумҳурии Тоҷикистон дар Конфедератсияи Швейтсария хабар доданд,  Шурои ҳуқуқи инсон дар рафти кори 59-ум Иҷлосаш беш аз 60 гузориши аз ҷониби Дафтари Комиссари олии ҳуқуқи инсон, коршиносони ҳуқуқи инсон ва дигар мақомоти тафтишотӣ дар мавзӯъҳои гуногун марбут ба вазъи ҳуқуқи инсон дар беш аз 40 кишвари ҷаҳонро баррасӣ намуд. Дар маҷмӯъ Шуро 32 муколамаи интерактивӣ баргузор ҳоҳад кард.

Иҷлосияи мазкур аз 16 июн то 9 июли соли 2025 дар шаҳри  Женева идома хоҳад ёфт.

АКС: Сафорати Ҷумҳурии Тоҷикистон дар Конфедератсияи Швейтсария