Дар деҳаи Томини ноҳияи Айнӣ муассисаи томактабӣ бунёд мегардад

ДУШАНБЕ, 22.07.2025 /АМИТ «Ховар»/. Бахшида ба 35-солагии Истиқлоли давлатии Ҷумҳурии Тоҷикистон дар деҳаи Томини Ҷамоати деҳоти Айнии ноҳияи Айнӣ ба бунёди бинои муассисаи таҳсилоти томактабӣ санги асос гузошта шуд. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Айнӣ хабар доданд.

Тавре иттилоъ дода шуд, бунёд ва баистифодадиҳии боғчаҳои бачагона дар ноҳияи Айнӣ идома дорад. Дар ин замина дар ҳар деҳае, ки дорои зиёда аз 100 хоҷагӣ мебошад, бунёди кӯдакистон зарур шуморида мешавад.

Муассиса аз ду ошёна иборат буда, дорои ду ҳуҷраи таълимӣ, ду ҳуҷра барои хоби кӯдакон, ду ҳуҷраи корӣ, ошхона, толори мусиқӣ, ҳуҷраи беҳдоштӣ, ҳуҷраи техникӣ ва буфет хоҳад буд.

Лоиҳаи бино аз ҷониби Корхонаи фаръии Корхонаи воҳиди давлатии «Лоиҳакаш» тарҳрезӣ гардида, аз ҷониби Мақомоти иҷроияи ҳокимияти давлатии ноҳияи Айнӣ ва дастгирии сокинони саховатпешаи деҳаи Томин бунёд мегардад. Муассиса барои 60 таълимгиранда пешбинӣ шудааст.

АКС: Мақомоти иҷроияи ҳокимияти давлатии ноҳияи Айнӣ