Дар ноҳияи Мурғоб муассисаи таълимии томактабии «Лола» ба истифода дода шуд

ДУШАНБЕ, 01.07.2025 /АМИТ «Ховар»/. Дар доираи сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба шаҳру ноҳияҳои Вилояти Мухтори Кӯҳистони Бадахшон, дар Ҷамоати деҳоти Ғоҷо Бердибаеви ноҳияи Мурғоб муассисаи таълимии томактабии «Лола» барои кӯдакон бо иштироки намояндагони Ҳукумати Ҷумҳурии Тоҷикистон, мақомоти иҷроияи ҳокимияти давлатии вилоят ва ноҳия ба таври маҷозӣ ба истифода дода шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Мурғоб иттилоъ медиҳад.

Муассисаи таълимии томактабӣ бо шароити хубу замонавӣ бо маблағи умумии 452 ҳазор сомонӣ бо сифати баланд ва мутобиқ ба талаботи замони муосир сохта шуда, барои 40 нафар кӯдакони ин деҳаи дурдаст пешбинӣ гардидааст.

Иттилоъ дода шуд, ки дар деҳаи мазкур зиёда аз 1600 нафар аҳолӣ зиндагӣ мекунанд, ки акнун бидуни мушкилӣ фарзандони онҳо ба таълиму тарбия фаро гирифта мешаванд. Сокинон бунёди ин муассисаро самари сиёсати созанда ва бунёдкоронаи Президенти Ҷумҳурии Тоҷикистон муҳтарам Эмомалӣ Раҳмон арзёбӣ намуда, бо қаноатмандӣ миннатдории худро ба Пешвои миллат изҳор доштанд.

АКС аз бойгонӣ