Кӯшиши интиқоли ғайриқонунии маводи нашъаовар дар сарҳади ҷанубии Тоҷикистон пешгирӣ карда шуд

Июль 1, 2025 19:48

ДУШАНБЕ, 01.07.2025. /АМИТ «Ховар»/. Аз рӯи маълумоти оперативӣ, гурӯҳи қочоқбари фаромиллии воситаҳои нашъадори афғон иборат аз чор нафар бо роҳбарии Азархон валади Сайдумар, тахминан 50 сола, зодаи қарияи Каҷии вулусволии Хоҳони вилояти Бадахшони Афғонистон хатти сарҳади давлатии Ҷумҳурии Тоҷикистонро дар деҳаи Кишти ҷамоати деҳоти Нуриддин Маҳмудови ноҳияи Шамсиддин Шоҳин ғайриқонунӣ убур намуда, кӯшиши интиқоли маводи мухаддирро ба Тоҷикистон дошт.

Дар натиҷаи роҳандозии чорабиниҳои оперативӣ-ҷустуҷӯӣ аз тарафи кормандони Гурӯҳи фаврии Раёсати Кумитаи давлатии амнияти миллии Ҷумҳурии Тоҷикистон дар вилояти Хатлон дар якҷоягӣ бо хизматчиёни ҳарбии дидбонгоҳи сарҳадии 5-уми  “Хирманҷо”-и қисми низомии Раёсати Қӯшунҳои Сарҳадии Кумитаи давлатии амнияти миллии Ҷумҳурии Тоҷикистон масири ҳаракати гурӯҳи ҷинояткор муайян ва қочоқи маводи мухаддир пешгирӣ карда шуд.

Зимни амалиёти боздошт қочоқбарони афғон ба амри кормандони амниятӣ оид ба таслим шудан итоат накарда, аз силоҳи оташфишон тир кушоданд. Дар натиҷаи оташи ҷавобӣ роҳбари гурӯҳи қочоқбарон Азархон валади Сайдумар ва аъзои гурӯҳ Азизи Розмуҳаммад, тахминан 30 сола, зодагони қарияи Каҷии вулусволии Хоҳони вилояти Бадахшони Афғонистон безарар карда шуданд. Аъзои боқимондаи гурӯҳ ба муқобилияти мусаллаҳона тоб наоварда, ба самти Афғонистон фирор намуданд.

Дар ҷойи ҳодиса 2 адад автомати “Калашников” бо тирдон ва 17 дона тир, 1 адад таҷҳизоти шаббин, 1 адад қаиқи резинӣ, 3 борхалта бо 59 бастаи дорои маводи нашъаовари навъи “афюн” ва як бастаи дорои маводи мухаддири навъи “метамфитамин” дарёфт ва мусодира карда шуд.

Тибқи хулосаи шуъбаи экспертизаи судии Раёсати Агентии назорати маводи нашъадори назди Президенти Ҷумҳурии Тоҷикистон дар вилояти Хатлон, маводи дарёфтшуда 57,515 кг воситаи нашъадори навъи “афюн” ва 960 грамм навъи “амфитамин” буда, вазни умумиашон 58 килограмму 475 грамро ташкил медиҳад.

Вобаста ба ҳолати мазкур аз тарафи шуъбаи тафтишоти Гурӯҳи фаврии Раёсати Кумитаи давлатии амнияти миллии Ҷумҳурии Тоҷикистон дар вилояти Хатлон бо дастрасии моддаҳои 195 қисми 2, 200 қисми 4, банди “д”, 289 қисми 3 ва 335 қисми 2-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, чорабиниҳои оперативӣ-тафтишотӣ ҷиҳати муайян ва дастгир намудани ҳаммаслакони ин гурӯҳи ҷиноятӣ идома доранд.

Ёдовар мешавем, ки ҳифзи марзу буми Ватан, Истиқлоли давлатӣ ва ваҳдату якпорчагӣ ҳадафи аслии Ҳукумат ва мардуми кишвар ба ҳисоб меравад. Бо шарофати заҳматҳои шабонарӯзии кормандони мақомоти низомию ҳифзи ҳуқуқ суботу амният дар ҷумҳурӣ таъмин буда, ҳаёти осоишта ва ободкорию созандагӣ ҷараён дорад.

Ҳамон вақт метавон дар муқобили таҳдиду хатарҳои муосир   дастболо шуд, ки агар сокинони минтақаҳои наздисарҳадӣ ҳушёру зирак, равшанзамир ва огоҳ дар хатти марз амал намоянд ва қалбашон саршор аз меҳру муҳаббат  ба Ватану миллат бошад ва  ба таҳаввулоти минтақа бо назардошти риояи манфиатҳои миллӣ бархӯрд дошта бошанд.

Кумитаи давлатии амнияти миллии Ҷумҳурии Тоҷикистон дар баробари ҷинояткориҳои муташаккил, терроризму экстремизм ва  нигаҳдории ғайриқонунии силоҳу муҳиммоти ҷангӣ муборизаи беамонро бар зидди қочоқ ва муомилоти ғайриқонунии маводи мухаддир низ ба роҳ мондааст. Зеро муомилоти ғайриқонунии маводи мухаддир боиси афзоиши бемории нашъамандӣ ва таҳдид ба генофонди миллӣ мегардад.

Бинобар ин бояд ҳар як шаҳрванди кишвар, махсусан онҳое, ки дар манотиқи наздимарзӣ сукунат доранд, бо зоҳир намудани ҳушёрию зиракӣ ва эҳсоси ватандӯстӣ ба кормандони мақомоти марзбонӣ ва ҳифзи ҳуқуқ дар пешгирӣ ва ошкор сохтани ҷинояткорӣ, аз ҷумла сарҳадшиканӣ кӯмак расонанд. Фаромӯш набояд кард, ки ҳифзи Ватан вазифаи муқаддаси ҳар як шаҳрванди Ҷумҳурии Тоҷикистон мебошад.

Маркази робитаҳои ҷамъиятии
Кумитаи давлатии амнияти миллии Ҷумҳурии Тоҷикистон

Июль 1, 2025 19:48

Хабарҳои дигари ин бахш

Аз 26 то 29 июл дар баъзе кӯчаҳо ва хиёбони Рӯдакии пойтахт ҳаракати воситаҳои нақлиёт маҳдуд карда мешавад
НИШАСТИ МАТБУОТӢ. Дар бозорҳои истеъмолии Тоҷикистон беш аз 107 ҳазор килограмм маҳсулоти бесифат ва хавфнок нобуд карда шуд
Бо иштироки ҳайати роҳбарикунандаи Вазорати мудофиаи Тоҷикистон ҷамъомадӣ таълимӣ-методӣ доир гардид
Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар медиҳад
Дар вилояти Суғд кӯшиши интиқоли 70 кг маводи нашъадор пешгирӣ гардид
Дар Озмуни байналмилалии нозирони навраси ҳаракат 7 даста аз давлатҳои ИДМ иштирок менамояд
Вобаста ба малакаи амалии кӯдакон оид ба бехатарии ҳаракат дар роҳ конфронси байналмилалӣ доир шуд
Нақшаи Барномаи муштараки «Тағйири низомҳои озуқаворӣ барои беҳтар намудани сифати ғизо» қабул шуд
Ҳайати Тоҷикистон дар ҷаласаи Маҷмаи умумии фавқулодаи Созмони байналмилалии мудофиаи гражданӣ иштирок намуд
Ташаккули дониши кӯдакон оид ба бехатарии ҳаракат дар роҳ дар конфронси байналмилалӣ баррасӣ мегардад
Дар Қазоқистон ҷаласаи роҳбарони мақомоти корҳои дохилии пойтахтҳои давлатҳои аъзои ИДМ доир шуд
Дар Гулистон Слёти III байнидавлатии нозирони навраси ҳаракати давлатҳои аъзои ИДМ доир мешавад