Тоҷикистон ва ЮНИСЕФ дар Ню-Йорк оид ба ҳуқуқи кӯдак ва инноватсия чорабинӣ доир намуданд

Июль 20, 2025 09:30

ДУШАНБЕ, 20.07.2025 /АМИТ «Ховар»/. 18 июл дар қароргоҳи ЮНИСЕФ дар шаҳри Ню-Йорк чорабинии сатҳи баланд таҳти унвони «Ҳуқуқи кӯдак ва инноватсия: имкониятҳо дар Тоҷикистон ва берун аз он» баргузор гардид. Чорабинӣ бо ташаббуси Намояндагии доимии Ҷумҳурии Тоҷикистон дар назди Созмони Милали Муттаҳид ва бо дастгирии ЮНИСЕФ баргузор шуда, ба масъалаҳои таҳкими ҳуқуқи кӯдакон тавассути истифодаи технологияҳои рақамӣ ва зеҳни сунъӣ бахшида шуд. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Дар чорабинӣ намояндагони ЮНИСЕФ, давлатҳои аъзои Созмони Милали Муттаҳид, Шурои миллии зеҳни сунъии Тоҷикистон, коршиносони соҳаи маориф ва намояндагони ширкатҳои инноватсионӣ иштирок намуданд.

Намояндаи доимии Ҷумҳурии Тоҷикистон дар назди Созмони Милали Муттаҳид Ҷонибек Ҳикмат аҳаммияти чорабиниро дар таҳкими ҳуқуқи кӯдак тавассути навовариҳои рақамӣ ва зеҳни сунъӣ таъкид намуда, изҳор дошт, ки Тоҷикистон бо роҳнамоии Президенти Ҷумҳурии Тоҷикистон муҳтарам Эмомалӣ Раҳмон ҳамеша ба таъмини ҳуқуқу манфиатҳои кӯдакон ва фароҳамсозии шароити мусоид барои рушди онҳо афзалият медиҳад.

Дар идома директори шарикӣ бо ҷомеаи байналмилалӣ дар ЮНИСЕФ Мандип О’Брайен аз дастовардҳои муштараки Тоҷикистон ва ЮНИСЕФ дар самти ҳимояи ҳуқуқи кӯдакон ёдовар шуд.

Вазири маориф ва илми Ҷумҳурии Тоҷикистон Раҳим Саидзода дар мавзуи «Ҳуқуқи кӯдак ва дастовардҳои Тоҷикистон дар ин самт» сухан гуфта, изҳор намуд, ки дар партави сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳимоя ва пуштибонии оила, модар ва кӯдак дар меҳвари сиёсати иҷтимоии давлат қарор дорад.

Таъкид карда шуд, ки дар Ҷумҳурии Тоҷикистон ҳуқуқи кӯдак дар сатҳи Конститутсия мустаҳкам гардида, тибқи моддаи 34-и он, модар ва кӯдак зери ҳимоя ва ғамхории махсуси давлат қарор доранд. Тарбияи кӯдакон дар муҳити оила, рушди ҳамаҷонибаи шахсият ва таъмини ҳифзи ҳуқуқу манфиатҳои ноболиғон ва аъзои ғайриқобили меҳнати оила, ҷузъи муҳимми сиёсати иҷтимоии Ҷумҳурии Тоҷикистон ба шумор меравад.

Аз нақши ЮНИСЕФ дар татбиқи Стратегияи миллии ҳифзи иҷтимоии аҳолӣ барои давраи то соли 2040, рушди барномаҳои рақамии таълимӣ ва дигар иқдомҳои муштарак низ ёдоварӣ карда шуд.

Бо қаноатмандӣ тазаккур дода шуд, ки ҷалби кӯдакон ба таҳсилоти томактабӣ дар даҳсолаи охир аз 12,3% (соли 2015) ба 23,7% (соли 2025) расида, бо ташаббус ва таваҷҷуҳи Президенти Ҷумҳурии Тоҷикистон муҳтарам Эмомалӣ Раҳмон дар панҷ соли оянда 800 муассисаи томактабӣ ва 1000 муассисаи таҳсилоти миёна бунёд мегардад.

Чорабинӣ Тоҷикистонро ҳамчун ҷониби фаъол ва ташаббускор дар истифодаи зеҳни сунъӣ ба манфиати иҷтимоӣ, бахусус дар самти маориф ва ҳифзи ҳуқуқи кӯдакон муаррифӣ намуда, фазои муносиб барои густариши ҳамкории байналмилалӣ, ҷалби бахши хусусӣ ва муаррифии таҷрибаи кишвар дар сатҳи ҷаҳонӣ фароҳам овард.

АКС: Маркази матбуоти Вазорати маориф ва илми Ҷумҳурии Тоҷикистон

Июль 20, 2025 09:30

Хабарҳои дигари ин бахш

«ИЛМ-ФУРӮҒИ МАЪРИФАТ». 27 октябр маросими қадрдонии ғолибони ҷойҳои ифтихории даври ҷумҳуриявии озмун доир мешавад
Масъалаи пайваст намудани муассисаҳои таълимии Тоҷикистон ба интернет баррасӣ шуд
Соли 2025 хонандагони муассисаҳои таълимии ноҳияи Данғара дар олимпиадаҳои байналмилалӣ соҳиби 148 медал гардиданд
72 оилаи омӯзгорони Донишгоҳи давлатии Данғара бо манзили истиқоматӣ таъмин мегарданд
Дар Донишгоҳи давлатии Кӯлоб барои донишҷӯёни варзишгар шароити мусоид фароҳам оварда шудааст
Даври ниҳоии Озмуни ҷумҳуриявии «Илм-фурӯғи маърифат» оғоз шуд
Дар Донишгоҳи давлатии Хоруғ Маркази таълимии «Иқтисоди сабз» таъсис дода шуд
«ФУРӮҒИ СУБҲИ ДОНОӢ КИТОБ АСТ». Нимаи дуюми моҳи ноябр даври ниҳоии озмуни ҷумҳуриявӣ доир мегардад
1 ноябр хонандагони муассисаҳои таҳсилоти миёнаи умумии Тоҷикистон ба таътили тирамоҳӣ мебароянд
Ҷаласаи ситоди даври чоруми Озмуни ҷумҳуриявии «Илм – фурӯғи маърифат» баргузор гардид
Дар Донишгоҳи технологии Тоҷикистон раванди озмоишии модулҳои таълимии лоиҳаи Донишгоҳи кушодаи инноватсияҳо дар озуқаворӣ гузаронида шуд
Дар Донишгоҳи давлатии Кӯлоб дар мавзуи масъалаҳои мубрами забоншиносӣ ва тарҷумашиносӣ конференсияи байналмилалӣ баргузор шуд