Ба соҳаи маорифи вилояти Хатлон Сертификат дар ҳаҷми беш аз даҳ миллион сомонӣ тақдим карда шуд

ДУШАНБЕ, 20.08.2025. /АМИТ «Ховар»/. Аз ҷониби Вазорати маориф ва илми Ҷумҳурии Тоҷикистон ба Мақомоти иҷроияи ҳокимияти давлатии вилояти Хатлон Сертификат дар ҳаҷми даҳ миллиону пансад ҳазор сомонӣ тақдим гардид. Дар ин хусус ба АМИТ «Ховар» аз хадамоти матбуоти Раиси вилояти Хатлон иттилоъ доданд.

Сертификат барои таъмини муассисаҳои таълимӣ бо кабинетҳои лингофонӣ дар доираи «Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои давраи то соли 2030», таҷҳизоти томактабӣ дар доираи «Барномаи давлатии рушди таҳсилоти томактабӣ дар Ҷумҳурии Тоҷикистон барои солҳои 2020-2025» ва кабинетҳои фаннию озмоишгоҳҳо дар доираи «Барномаи давлатии таъмини муассисаҳои таҳсилоти умумӣ бо кабинетҳои фаннӣ ва озмоишгоҳҳои муҷаҳҳази таълимӣ дар Ҷумҳурии Тоҷикистон барои солҳои 2020-2027» тақдим карда шуд.

Маориф яке аз самтҳои афзалиятноки Ҳукумати Ҷумҳурии Тоҷикистон мебошад. Аз ин рӯ кормандони ин соҳа ва омӯзгорон пайваста кӯшишу талош менамоянд, ки таълимро дуруст ба роҳ монда, насли бомаърифату соҳибҳунар тарбия намоянд.

Яке аз масъалаҳои асосие, ки имрӯз аз ҷониби Ҳукумати мамлакат ба он таваҷҷуҳи бештар равона мегардад, ин дар низоми таҳсил амалӣ намудани меъёрҳои ҷаҳонӣ ва тайёр намудани мутахассисони соҳибкасби ҷавобгӯ ба талаботи бозори меҳнат мебошад.

АКС: Хадамоти матбуоти Раиси вилояти Хатлон