Беш аз 94 фоизи ҳамлу нақли бор дар Тоҷикистон тавассути нақлиёти автомобилӣ таъмин карда мешавад

ДУШАНБЕ, 19.08.2025 /АМИТ «Ховар»/. 90 фоизи ҳамлу нақл дар Тоҷикистон тавассути нақлиёти автомобилӣ анҷом дода мешавад, аз ин рӯ, нақлиёти автомобилӣ пешсафи ягона дар гардиши боркашонӣ ба шумор меравад, иттилоъ медиҳад АМИТ «Ховар» бо истинод ба Вазорати нақлиёти Ҷумҳурии Тоҷикистон.

Дар шашмоҳаи якуми соли равон дар Тоҷикистон тавассути ҳама намудҳои нақлиёт беш аз 66,6 миллион тонна бор интиқол дода шудааст, ки нисбат ба ҳамин давраи соли 2024 9,3 фоиз зиёд мебошад. Дар ин давра зиёда аз 63,5 миллион тонна бор тавассути нақлиёти автомобилии вазорату идораҳо, ташкилоту муассисаҳо ва шахсони воқеӣ, ки ба ҳамлу нақли тиҷоратӣ машғуланд, интиқол дода шудааст. Ин шумора 94,6 фоизи ҳаҷми умумии боркашониро ташкил медиҳад.

Дар нимсолаи аввали соли 2025 тавассути нақлиёти роҳи оҳан беш аз 3,6 миллион тонна бор, аз ҷумла борҳои транзитӣ интиқол дода шудаанд, ки нисбат ба моҳҳои январ-июни соли 2024 ба андозаи 12,4 фоиз зиёд аст.

Дар ин давра маҷмуи маҳсулоти дохилии (ММД) Тоҷикистон 70,8 миллиард сомонӣ ($7,5 миллиард), таваррум 1,8 фоиз ва гардиши мол беш аз 33 миллиард сомонӣ ($3,5 миллиард) – ро ташкил дод. Гардиши мол байни Тоҷикистон ва кишварҳои аъзои Иттиҳоди Давлатҳои Мустақил дар нимсолаи аввали соли 2025 ба беш аз 2,1 миллиард доллари амрикоӣ расид, ки нисбат ба ҳамин давраи соли 2024 4,6 фоиз зиёд мебошад. Гардиши боркашонӣ, ки ҳаҷми корҳои иҷрошударо оид ба интиқоли бор дар бар мегирад, ба гардиши мол, ки амалиёти гуногуни логистикӣ, амсоли интиқол, ҷойгиркунӣ дар анбор, бастабандӣ ва ғайраро дар бар мегирад, таъсир мерасонад, аз ин рӯ нишондиҳандаи иқтисодӣ на камтар муҳим аз гардиши мол аст.

Барои Тоҷикистон интиқоли байналмилалии автомобилӣ бо сабаби маҳсур дар хушкӣ ва дур будани давлат аз долонҳои асосии баҳрӣ аҳамияти махсус дорад. Ин намуди нақлиёт имрӯз дар мамлакати мо ҳаракати самараноки молҳоро тавассути убури марзҳо таъмин намуда, тиҷорати Тоҷикистонро бо иқтисоди ҷаҳонӣ мепайвандад. Нақлиёти автомобилӣ имкон медиҳад, ки молҳои миллӣ, аз қабили маҳсулоти кишоварзӣ, меваҳои тару тоза ва коркардшуда, сабзавот, маҳсулоти бофандагӣ, пахта, маҳсулоти корхонаҳои саноатии мамлакат, захираҳои минералӣ ба зовияҳои гуногуни олам содирот карда шаванд.

Ҳамзамон нақлиёти автомобилӣ роҳро барои воридоти молу технологияҳои зарурӣ боз карда, ба гуногунрангӣ ва ғанисозии бозори Тоҷикистон мусоидат мекунанд.

АКС: Вазорати нақлиёти Ҷумҳурии Тоҷикистон