Дар Донишгоҳи миллии Тоҷикистон 12 ихтисоси нав таъсис дода шуд

ДУШАНБЕ, 01.08.2025 /АМИТ «Ховар»/. Дар шашмоҳаи якуми соли равон бо мақсади рушду инкишофи имконияти илмию таълимӣ ва ҷавобгӯ сохтани низоми таҳсил ба талаботи муосир дар Донишгоҳи миллии Тоҷикистон ба 12 ихтисоси нав дар зинаи бакалавр иҷозатнома дода шуд. Дар ин хусус имрӯз зимни нишасти матбуотӣ ректори Донишгоҳи миллии Тоҷикистон Эмомалӣ Насриддинзода иттилоъ дод.

Тавре ректори донишгоҳ иброз намуд, дар давраи ҳисоботӣ аз ҷониби Агентии назорат дар соҳаи маориф ва илми назди Президенти Ҷумҳурии Тоҷикистон барои 12 ихтисоси нав иҷозатнома гирифта шуд. Ин ихтисосҳо, аз ҷумла технологияи иттилоотии ҳисоби бухгалтерӣ, зеҳни сунъӣ, молия ва қарз дар иқтисоди берунӣ, хадамоти гумрукӣ, сиёсат ва робита бо ҷомеа, забони хориҷӣ ва ғайра мебошанд. Ин ихтисосҳо замонавӣ, рақобатпазир ва дорои зарфияти баланд дар бозори меҳнат мебошанд.

Иттилоъ дода шуд, ки дар 14 факултаи донишгоҳ донишҷӯён тибқи квотаи Президенти Ҷумҳурии Тоҷикистон таҳсил менамоянд ва шумораи онҳо 48 нафарро ташкил медиҳад. Аз ин шумора 121 нафар духтар ва 127 нафар писар мебошад.

Ҳамзамон дар самти фаъолияти илмӣ-таҳқиқотӣ иброз гардид, ки аз ҷониби муҳаққиқони донишгоҳ 4 нахустпатент ва 4 арзнома барои гирифтани нахустпатент ба Маркази миллии патенту иттилооти Вазорати рушди иқтисод ва савдои Ҷумҳурии Тоҷикистон супорида шуд.

Фаъолияти Парки технологии донишгоҳ низ ба таври зарурӣ ба роҳ монда шуда, имрӯз дар он дар 8 хати истеҳсолӣ номгӯйи маҳсулоти шустушӯӣ омода мегардад.

Шаҳлои САДРИДДИН,
АМИТ «Ховар»

АКС: АМИТ «Ховар»