Дар Душанбе Маркази тамоси электронӣ оид ба қабули муроҷиатҳо ташкил карда шуд

ДУШАНБЕ, 30.08.2025. /АМИТ «Ховар»/. Дар асоси дастури Раиси шаҳри Душанбе муҳтарам Рустам Эмомалӣ бо мақсади баррасии саривақтии муроҷиатҳои шаҳрвандон дар Раёсати Вазорати корҳои дохилӣ дар шаҳри Душанбе Маркази тамоси электронӣ оид ба қабули муроҷиатҳо ташкил карда шуд, ки он тавассути хати алоқаи телефонӣ фаъолият менамояд. Дар ин хусус ба АМИТ «Ховар» аз Раёсати Вазорати корҳои дохилӣ дар шаҳри Душанбе хабар доданд.

Тавре иттилоъ дода шуд, Маркази тамоси электронӣ оид ба қабули муроҷиатҳо бо мақсади қабули бемамониати зангҳои телефонӣ ва ҷалби таъҷилии гурӯҳи фаврӣ-тафтишотӣ ба макони ҳодиса таъсис дода шудааст.

Шаҳрвандон метавонанд дар вақти дилхоҳ ба мақомоти милитсияи пойтахт тавассути рақамҳои 102 ва 02 дар тамос шуда, дар бораи ҳодисаҳои гуногун иттилоъ дода, муроҷиат ё арзу шикоят намоянд.

Ин иқдом имконият медиҳад, ки шаҳрвандон бо милитсия дар алоқаи зич қарор дошта, кормандони милитсия кирдорҳои ҳуқуқвайронкунию ҷинояткориро сари вақт ошкор ва пешгирӣ  намоянд.

АКС: Раёсати Вазорати корҳои дохилӣ дар шаҳри Душанбе