НИШАСТИ МАТБУОТӢ. Зиёда аз 57 миллион сомонӣ маблағ ба манфиати модару кӯдак ситонида шудааст
ДУШАНБЕ, 05.08.2025 /АМИТ «Ховар»/. Дар шашмоҳаи якуми соли 2025 ба Хадамоти иҷро 5 ҳазору 816 истеҳсолоти иҷро оид ба ситонидани маблағи алимент ворид гардид. Аз солҳои пешин дар маҷмуъ 102 ҳазору 845 ҳуҷҷати иҷро вобаста ба ситонидани маблағи алимент дар баррасии иҷрочиён мавриди иҷро қарор дорад. Дар ин хусус имрӯз сардори Хадамоти иҷрои назди Ҳукумати Ҷумҳурии Тоҷикистон Аҳтам Абдуллозода зимни нишасти матбуотӣ иттилоъ дод.
«Зиёда аз 57 миллиону 329 ҳазору 590 сомонӣ аз ҷониби иҷрочиён ба манфиати модару кӯдак ситонида шуд, ки назар ба ҳамин давраи сипаришуда 35 миллиону 904 ҳазору 75 сомонӣ зиёд мебошад. Дар раёсати пешбурди феҳристи қарздорон ва махзани электронии Хадамоти иҷро барои напардохтани маблағҳои қарзӣ 1 ҳазору 308 нафар шахси воқеӣ ва 10 шахси ҳуқуқӣ ба феҳристи ягонаи давлатии қарздорон ворид карда шудаанд», — гуфт Аҳтам Абдуллозода.
Иброз гардид, ки дар давраи ҳисоботӣ ба Хадамоти иҷро 239 муроҷиати шахсони воқеӣ ва ҳуқуқӣ вобаста ба масъалаҳои гуногуни ба истеҳсолоти иҷро алоқаманд ворид гардидааст. Ҳамаи муроҷиатҳо тибқи Қонуни Ҷумҳурии Тоҷикистон «Дар бораи муроҷиатҳои шахсони воқеӣ ва ҳуқуқӣ» мавриди баррасӣ қарор гирифтанд.
Барои баланд бардоштани маърифати ҳуқуқии шаҳрвандон кормандони мақомот байни аҳолӣ ва ташкилоту корхонаҳо дар мавзуъҳои гуногуни ҳуқуқӣ ва марбут ба соҳаи истеҳсолоти иҷро 953 вохӯрию суҳбат ва баромад намуда, дар нашрияҳои давлатӣ мақолаҳо ба чоп расониданд.
Инчунин дар нишаст таъкид гардид, ки вобаста ба Солҳои рушди иқтисоди рақамӣ ва инноватсия эълон гардидани солҳои 2025-2030 моҳи марти соли равон дар сохтори хадамот шуъбаи рақамикунонии истеҳсолоти иҷро таъсис дода шудааст. Тадбирҳои муассир барои бартараф намудани мушкилоти ҷойдошта ва ҳарчи зудтар гузаштан ба низоми рақамикунонии соҳаи истеҳсолоти иҷро андешида мешаванд.
Раъно НУСРАТУЛЛО,
АМИТ «Ховар»
АКС: АМИТ «Ховар»
Дар Тоҷикистон Рӯзҳои иммунизатсияи иловагӣ бар зидди бемориҳои сурхча ва гулафшон оғоз гардид
Мутахассисон баланд шудани ҳолати ифлосшавии ҳавои атмосфериро дар Тоҷикистон пешгӯӣ менамоянд
Барои пешгирии бемориҳои зоонозӣ ҷаласа доир карда шуд
Дар Ховалинг ҷаласаи Шурои директорони муассисаҳои таҳсилоти миёнаи касбӣ баргузор гардид
Дар Душанбе оид ба нақши зеҳни сунъӣ дар соҳаи тандурустӣ ҳамоиш доир гардид
МАСЛИҲАТИ МУТАХАССИС. Оё фарзанди шумо барои ба мактаб рафтан омода аст?
Тоҷикистон ва Амрико ҳамкориро дар соҳаи тандурустӣ тақвият медиҳанд
Дар Душанбе доир ба Истиқлоли давлатӣ ҳамчун рукни асосии идеологияи миллӣ ҳамоиши ҳизбиён баргузор шуд
Дар Балҷувон дар мавзуи «Сулҳу субот – омили рушди устувори соҳаи сайёҳӣ» вохӯрии судманд доир гардид
Ҳамкории Тоҷикистон бо Барномаи рушди СММ дар самти ҳифзи ҳуқуқи инсон муҳокима карда шуд
Муовини Сарвазири Тоҷикистон бо сохтмони маҳаллаи навбунёд дар деҳаи Зарангаки ноҳияи Рашт шинос шуд
Нақши занон дар мақомоти олии қонунгузории Тоҷикистон дар даврони соҳибистиқлолӣ назаррас аст
