Ноибони Президенти ФФТ бо ҳолати омодагии варзишгоҳҳои шаҳри Ҳисор ба мусобиқаҳои байналмилалӣ шинос шуданд

ДУШАНБЕ, 02.08.2025 /АМИТ «Ховар»/. Масъалаҳои марбут ба рушди варзиш, бахусус футбол зимни мулоқоти Раиси шаҳри Ҳисор, аъзои Маҷлиси миллии Маҷлиси Олии Ҷумҳурии Тоҷикистон Ҷаббор Носирзода бо намояндагони Федератсияи футболи Тоҷикистон, ноибони Президенти федератсия Алишер Урунов ва Сайвалӣ Дониёрзода ва директори генералии Лигаи футболи Тоҷикистон Субҳон Шодиев дар шаҳри Ҳисор баррасӣ гардиданд.

АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад, ки дар мулоқот ҳамзамон масъалаҳои омодагии «Варзишгоҳи марказӣ»-и шаҳри Ҳисор барои баргузории мусобиқаҳои байналмилалӣ, ҳолати омодагии варзишгоҳи «Ҷавонӣ»-и шаҳр ва дигар толору варзишгоҳҳо, ки барои бозиҳои футболи ҷумҳуриявӣ ва шаҳрӣ муҷаҳҳаз гардонида шудаанд, мавриди баррасӣ қарор дода шуданд.

Ҳамчунин намояндагони Федератсияи футболи Тоҷикистон дар варзишгоҳҳои мавриди назар бо корҳои анҷомёфта дар самти таъмиру тармими онҳо шинос шуданд ва вобаста ба бартараф намудани камбудиҳои ҷойдошта дар варзишгоҳҳо бо масъулин мувофиқа намуданд.

АКС: Мақомоти иҷроияи ҳокимияти давлатии шаҳри Ҳисор