Ҳамкории Тоҷикистон ва Швейтсария дар доираи лоиҳаҳои сиёсати пулию қарзӣ тақвият меёбад
ДУШАНБЕ, 19.09.2025 /АМИТ «Ховар»/. Самараи муносибатҳои боэътимоди иқтисодию сиёсии Тоҷикистон ва Швейтсария давоми се даҳсолаи охир, истифодаи самараноки зарфияти мавҷуда ва самтҳои нави ҳамкорӣ дар меҳвари мулоқоти Раиси Бонки миллии Тоҷикистон Фирдавс Толибзода ва Сафири Фавқулода ва Мухтори Конфедератсияи Швейтсария дар Ҷумҳурии Қазоқистон ва Ҷумҳурии Тоҷикистон Салмон Бал ва намояндагони ширкати «SICPA SA» қарор гирифт. Дар ин хусус АМИТ «Ховар» бо истинод ба Бонки миллии Тоҷикистон иттилоъ медиҳад.
Фирдавс Толибзода бо изҳори қаноатмандӣ аз сатҳи ҳамкории муфиди ду давлат дар доираи муассисаҳои Бреттон-Вудс гуфт, ки Швейтсария дар Шурои директорони Хазинаи байналмилалии асъор ва Гурӯҳи Бонки ҷаҳонӣ манфиатҳои Ҷумҳурии Тоҷикистонро фаъолона намояндагӣ мекунад. Ин барои таъмини суботи иқтисодии мамлакат муҳим дониста мешавад.
Бонки миллии Тоҷикистон бо Бонки миллии Швейтсария дар доираи лоиҳаҳои марбут ба идоракунии захираҳои байналмилалӣ, сиёсати пулию қарзӣ, идоракунии хавфҳо, омор ва тавозуни пардохт ҳамкории судманд дошта, Дафтари Швейтсария оид ба ҳамкорӣ (SECO) солҳои охир якчанд лоиҳаро дар бахши молиявии Ҷумҳурии Тоҷикистон дастгирӣ намудааст. Онҳо ислоҳоти зиддибуҳронӣ ва ташкили низоми молиявии устувор ва самаранокро дар бар мегиранд.
Ҷонибҳо инчунин оид ба фаъолияти ширкати «SICPA SA» ибрози назар намуда, намояндагони ширкат дар бораи таҷриба ва маҳсулоти худ маълумот доданд. Салмон Бал аз фаъолияти самарабахши Бонки миллии Тоҷикистон дар самти ислоҳот барои танзими сатҳи таваррум изҳори қаноатмандӣ намуд.
Раиси Бонки миллии Тоҷикистон гуфт, ки пули миллии сомонӣ аз соли 2000 то имрӯз дар ҳамкорӣ бо ширкатҳои байналмилалии чопи пул ба муомилот бароварда шуда, Бонки миллии Тоҷикистон саъй менамояд, ки сифати пули миллиро мувофиқи меъёрҳои пешрафтаи байналмилалӣ беҳтар намояд. Дар ин замина изҳори умедворӣ карда шуд, ки ширкат оид ба таҷрибааш дар соҳаи чопи пул ва имконияти ҳамкорӣ бо Тоҷикистон иттилооти зарурӣ пешниҳод менамояд.
Дар вохӯрӣ ҷонибҳо вобаста ба дигар самтҳои ҳамкорӣ табодули назар ва барои тақвияти ҳамкории мутақобили судманд изҳори омодагӣ намуданд.
АКС: Бонки миллии Тоҷикистон
Сокини ноҳияи Ҷайҳун Каримҷон Бутаев 50 сол боз ба анорпарварӣ машғул аст
Дар Шуғнон корхонаи нави истеҳсоли асфалт ба фаъолият оғоз кард
Нақши Тоҷикистон дар таҳкими амнияти ядроӣ ва радиатсионӣ баланд арзёбӣ гардид
Масъалаи таҳвили гази табиӣ аз Узбекистон ба Тоҷикистон дар давраи тирамоҳу зимистон баррасӣ карда шуд
Мутахассисони соҳаи энергетикаи Қирғизистон бо Неругоҳи барқи обии «Роғун» шинос шуданд
Тоҷикистон ва ИМА ҳамкориро дар самти тиҷораткунонии ихтироот тақвият мебахшанд
Дар Қазоқистон Намоишгоҳи маҳсулоти кишоварзӣ, саноатӣ, ҳунарҳои мардумӣ ва таомҳои миллии Хатлон оғоз мегардад
«Flaynas» ояндаи наздик дар масири Ҷидда-Душанбе-Ҷидда парвозҳои мустақими ҳавоӣ оғоз менамояд
Дар Бонки миллии Тоҷикистон имконияти платформаи рақамии амалиёти факторингӣ бо ширкати «OZPLANET» баррасӣ шуд
Дар Хоруғ корхонаи истеҳсоли макарон бунёд карда мешавад
Дар Тоҷикистон лоиҳаи «Стратегияи миллии ҳифзи гуногунии биологӣ» таҳия карда мешавад
Байни Тоҷикистон ва Беларус оид ба ҳамкории тиҷоратию иқтисодӣ даҳ санади ҳамкорӣ ба имзо расид
